Төтенше жағдайлар министрлігі ауа райының қолайсыздығына байланысты дауылды ескертулерді ескеріп, қолайсыз жағдайда елді мекендерден шықпауға кеңес береді, деп хабарлайды Egemen.kz ТЖМ баспасөз қызметіне сілтеме жасап.

«Қатты боран мен қарлы бұрқасын салдарынан түнде Ұлытау, Қарағанды, Абай және Ақтөбе облыстарында бірқатар жеңіл көлік жолда қалып қойған», — делінген хабарламада.

Ырғыз ауданында «Ырғыз-Нұра» тас жолының 80-шақырымында Газель маркалы автокөлік қар құрсауында қалған. Құтқарушылар вахталық көлікпен жетіп, көлікті қардан шығарып, тазартылған жол бөлігіне дейін сүйреп апарды. Жүргізуші өз бетінше жолын жалғастырды, медициналық көмек қажет болған жоқ.

Бұқар жырау ауданында, Құрылыс ауылының маңында жеңіл автокөлік қарға батып, жүре алмай қалған. Оқиға орнына жеткен ТЖМ қызметкерлері Трэкол жол талғамайтын көлігінің көмегімен көлікті қардан шығарып, төрт жолаушыны құтқарды. Олардың арасында бала да болған. Абырой болғанда, ешкім зардап шеккен жоқ.