Бұған дейін Дональд Трамп Иранды ядролық қару жөнінде келіссөздерге шақырған болатын.

Иранның жоғарғы басшысы аятолла Әли Хаменеи АҚШ президенті Дональд Трамптың Иранның ядролық бағдарламасы жөніндегі келіссөздерді қайта бастау туралы ұсынысынан бас тартты, деп хабарлайды inbusiness.kz сайты DW-ға сілтеме жасап.

Мемлекеттік Irna ақпарат агенттігінің хабарлауынша, аятолла Әли Хаменеи Тегеранда шенеуніктер мен әскери қызметкерлер алдында сөз сөйледі. Ол АҚШ-ты тікелей атамаса да, "агрессивті" үкіметтерді "қорқытып-үркітті" деп айыптап, Иранның "ешқашан олардың үмітін ақтамайтынын" мәлімдеді.

– Олар қоғамда "неге біз келіссөздерге дайын екенімізді білдірсек те, Иран келіссөз жүргізуден бас тартып отыр?" деген күмән туғызуға тырысады. Бірақ олардың шынайы мақсаты – диалог емес, үстемдік орнату және өз ұстанымдарын мәжбүрлеп таңу (олардың ұстанымы – ред. DW), – деді Хаменеи.

Иранның Жоғарғы басшысының айтуынша, мәселе тек ядролық бағдарламада ғана емес. АҚШ Иранның қорғаныс және зымырандық бағдарламаларына, сондай-ақ оның халықаралық байланыстарына қатысты өз талаптарын қойып отыр.

Хаменеи келіссөздерден бас тартқанымен, Иранның ядролық бағдарламасы "қай жерде болса да" талқылануы мүмкін екенін айтты, бірақ нақты мәлімет бермеді.