Елімізде еңбекке уақытша жарамсыздық туралы қағаз біртіндеп қолданыстан шығып, орнына электронды нұсқалар келмек. Енді емхана мен ауруханаларда берілетін анықтамаларды онлайн түрде, медициналық ақпараттық жүйелер арқылы алуға болады, деп хабарлайды El.kz интернет порталы.

Денсаулық сақтау министрі Ақмарал Әлназарованың айтуынша, қажетті бұйрыққа қол қойылған, және жүйелі көшу процесі басталып кеткен.

Қазіргі уақытта қағаз және электронды нұсқалар қатар қолданылып жатыр, алайда таяу уақытта барлығы толық цифрландырылмақ. Электронды "больничный" парақтарын қазірдің өзінде медициналық ақпараттық жүйелер арқылы алуға болады. Қағаз нұсқадан толық бас тартуға тек соңғы қадам қалды, – деді министр.

Оның айтуынша, бұл үдеріс кезең-кезеңімен жүзеге асады, алайда техникалық тұрғыдан барлық дайындық аяқталған. Демек, қағаз анықтамалар өткеннің еншісінде қалмақ.

Айта кетейік, электронды формат әзірге еліміздің барлық өңірінде іске қосылмағанымен, Астана, Алматы, Қарағанды және тағы басқа бірнеше аймақта бұл жүйе жұмыс істей бастады. Денсаулық сақтау министрлігі емханалардың басым бөлігі жаңа жүйеге көшуге дайын екенін мәлімдеді.

Сонымен қатар, электронды еңбекке уақытша жарамсыз қағазы қауіпсіздік талаптарына сай қорғалған. Оған тек дәрігер, науқастың өзі және жұмыс беруші ғана қол жеткізе алады. Барлық мәліметтер шифрланып, сенімді жүйеде сақталады.

Енді науқастарға қағаз құжатты алып жүгірудің немесе әр кабинетке барып қолхат жинаудың қажеті жоқ. Электронды нұсқа автоматты түрде ортақ базаға енгізіліп, жұмыс беруші оны тікелей жүйе арқылы көре алады.

Бұған дейін 1 шілдеден бастап банктер қазақстандықтардың шоттары туралы мәлімет бере бастайтыны туралы жазған едік.