Жауапты басқарманың өкілдері бөбекжайда тексеріс жұмыстарын бастады.

Қызылордада жекеменшік балабақшаға бүлдіршіндерді тасып жүрген көлік апатқа ұшырап, екі бала ауыр жағдайда ауруханаға түсті, деп хабарлады 31 арнаның Информбюро ақпараттық бағдарламасы.

Одан бөлек жүргізуші мен бала күтуші де жарақат алған. Қазір жол көлік оқиғасының себеп-салдарын полиция анықтап жатыр. Оқиға кеше таңғы жетілер шамасында болған. Төрт тәрбиеленушіні бөбекжайға алып бара жатқан тасымал көлігі автобуспен соқтығысқан. Соның кесірінен балалар отырған Шевролет маркалы жеңіл автомобиль жапырылып қалған.

Ал ұл-қыздардың қауіпсіздігіне бей-жәй қараған жекеменшік білім беру ұйымының өкілдері әзірге пікір білдірмеді. Жауапты басқарманың өкілдері бөбекжайда тексеріс жұмыстарын бастады. Себебі, тәртіп бойынша кішкентай балаларды арнайы жазуы бар автобус немесе газель тасуға тиіс. Қазір ауруханада жатқан 3 және 4 жастағы ұл мен қыздың жағдайы әлі де қиын дейді дәрігерлер. Ал тағы екі бүлдіршін амбулаториялық емге жіберілген.

"Қазір екі бала реанимация бөлімінде ем алуда. Жағдайлары ауыр, тұрақсыз. Дененің көптеген жарақаттарын алған. Оның ішінде бас ми шайқалуы диагноздары да бар", – деді Қызылорда облыстық көпбейінді балалар ауруханасы бас дәрігерінің орынбасары Гүлнұр Өсікбаева.