68 жасында белгілі қазақ актёрі Қайрат Кемалов өмірден өтті. Қаралы хабарды Сәкен Сейфуллин атындағы Қарағанды облыстық академиялық қазақ драма театрының ұжымы жеткізді, деп хабарлайды KAZ.NUR.KZ.

"Сәкен Сейфуллин атындағы Қарағанды облыстық академиялық қазақ драма театрының актёрі, Қазақстанның еңбек сіңірген қайраткері, Парасат орденінің иегері, "Қарағанды қаласының құрметті азаматы" Кемалов Қайрат Кемалұлының өмірден өтуіне байланысты отбасы мен жақын туыстарына, барша қазақ халқына шын көңілден қайғырып көңіл айтамыз!

Жаратушы өздеріңізге төзім мен сабыр сыйлап, қазаның артының қайырын берсін! Марқұмның жаны жәннатта, иманы жолдас болсын!" — делінген тетардың Instagram желісіндегі парақшасында жарияланған көңіл айту жеделхатында.

Театрдың ресми сайтындағы мәлімет бойынша, Қайрат Кемалұлы Кемалов 1957 жылы 8 қаңтарда Жезқазған облысы Жаңаарқа ауданының Атасу кентінде дүниеге келген.

1978 жылы Құрманғазы атындағы Алматы Мемлекеттік консерваториясын драма театр актёры мамандығы бойынша бітірген.

1978 жылы М.Әуезов атындағы Қазақ ұлттық драма театрының, 1980-1983 жылдары, 1985-1994 жылдары С.Сейфуллин атындағы Қарағанды облыстық академиялық қазақ драма театрының, 1990-1995 жылдары Ақмола облыстық қазақ музыкалық драма театрының актёрі болған.

1995 жылғы қыркүйектен бері – Сәкен Сейфуллин атындағы Қарағанды облыстық академиялық қазақ драма театрының әртісі.

Театр сахнасындағы рөлдері:

Ғабит Мүсірепов "Ақан Сері" – Ақан, Сәкен Сейфуллин "Қызыл сұңқарлар" – Еркебұлан, Уильям Шекспир "Отелло" – Отелло, Шерхан Мұртаза "Домалақ ана" – Бәйдібек би, Мұхтар Әуезов "Абай" – Абай, "Айман-Шолпан" –Арыстан, Мирза Ахундов "Мусье Жордан" – Масталишах дәруіш, Жолтай Әлмашұлы "Сәкеннің соңғы сапары" – Сәкен, Мар Барджиев "Ғашықтың тілі" – Мұқамбет, Әлімбек Оразбеков "Бір түп алма ағашы" – Зарқымбек, Ласло Дюрко "Электра" – Орест, Мұхтар Әуезов "Қарагөз" – Жарылғап, Ғабит Мүсірепов "Қыз Жібек" – Сарлыбай.

Кино саласындағы рөлдері:

Смағұл Елубай "Ақ боз үй" – би Пахраддин, Рүстем Әбдрашев "Қазақ хандығы" – Керей хан.

Марапаттары:

Қайрат Кемалов 2002 жылы Мәдениет және ақпарат министрлігінің "Құрмет" грамотасымен, 2024 жылы Республика күні қарсанында президент жарлығымен елдің мәдени дамуына қосқан елеулі үлесі үшін "Парасат орденімен" марапатталған.

2006 жылы Қазақстанның Еңбек сіңірген қайраткері атағын алған.

Сондай-ақ ол Қазақ хандығы – "Алмас қылыш" фильміндегі Керей хан рөлі үшін "Үздік ер адам рөлі" номинациясымен, "Ақ боз үй" көркем фильміндегі рөлі үшін "Үздік ер адам рөлі" номинациясымен марпатталған.

Мәтіннен қате тапсаңыз, бізге жазыңыз