Медициналық мекемелерде күзет күшейтілді. Алда барлық дерлік денсаулық үйлеріне бейнебақылау камералары қойылып, дабыл батырмасымен жабдықталады. Сондай-ақ қызметкерлерге қол жұмсағандар үшін жауапкершілік күшейтіледі .

Бұған ақ халаттыларға жиі жасалатын шабуыл себеп. Бұл жайлы Денсаулық сақтау министі Ақмарал Әлназарова әлеуметтік желідегі парақшасында жазды. Сала жетекшісі дәрігерлерге доқ көрсететіндер көбейгенін сөз етті. «Бұл – тек бір дәрігерге жасалған шабуыл емес. Бұл – ондаған пациенттің қараусыз қалуы, ондаған операцияның кейінге шегерілуі. Бұл – бүкіл денсаулық сақтау жүйесіне төнген тікелей соққы», — деді Әлназарова.