Ақтөбе облысында екі жыл бұрын төселген асфальт қирап жатыр.

Аудандық маңызы бар «Жұрын-Қаракөл» бағытында жөндеу жұмыстары 2023 жылы жүрген еді. Алайда көтерме жолдың үстіне төселген асфальт бірден үгітіліп қалды. Сапасыз атқарылған жұмысты былтыр Үкімет сағатында премьер-министр Олжас Бектенов те сынға алды. Алайда қираған жол сол күйі жатыр.

Екі жыл бұрын салынған асфальттың жайы осы. Жұрын мен Қаракөл ауылдарын байланыстыратын 30 шақырым жол бір қысқа шыдамаған. Өмір бойы оқтаудай түзу асфальтті аңасаған тұрғындар қайтадан қираған жолмен жүруге мәжбүр.

Жолдың сапасыз салынып жатқанын ауыл тұрғындары әу бастан-ақ әлеуметтік желілерге жариялаған еді. Үкімет басшысы Олжас Бектенов те кемшілікті жедел жоюды тапсырды. Алайда нәтиже жоқ.

Әлібек Байниязов, Қаракөл ауылының тұрғыны:

- Екі жыл бұрын салынған жол ғой енді. Оған ұқсамайды. Жөндейтін жерлері көп. Қайта жөндесе жақсы болады.

Руслан Бисенбаев, Қаракөл ауылының тұрғыны:

- Жасаған адамдарға біз қанағаттанған жоқпыз. Жаңбырда салады, түні болсын, күні болсын. Қар жауғанда да салған күндері болды. Біз күнде жүреміз ғой енді. Көлікпен жүргесін көреміз. Неше жылдан бері осыны айтып келе жатырмыз. Ешкім құлақ аспайды. Ешқандай бақылау жоқ.

«Жұрын-Қаракөл» жолын жөндеуге бюджеттен 768 млн теңге қаржы бөлінді. Аудандық әкімдік өкілдері мердігер қаражаттан тарылған жоқ дейді. Алайда санаулы ай ішінде шұрық-тесік болғанын байқаған шенеуніктер сотқа шағымданған. 30 шақырым жолдың 24 мың шаршы метрін қайта төсеу қажет.

Жомарт Бақыткелді, Мұғалжар ауданы әкімінің орынбасары:

- Ең бірінші мәселе ол жерде мердігер мекеменің жүргізген жұмыстары. Сол жерде сапа болмағандықтан осындай жағдайға алып келді. Қазір сот шешімі бойынша қалыпқа келтіру жүргізілуде. Жылдың аяғына дейін аяқтауды жоспарлап отырмыз.

Қираған жолды түгел жүріп өткенімізбен шұрық-тесікті жамап жүрген жұмысшы көрінбеді. Әр жерде қаңырап тұрған арнаулы техникаға ғана кезіктік. Құрылыс басында қыбырлаған жан болмаған соң мердігерге телефон соғып, мәселенің мән-жайын анықтадық.

Ернұр Шамишев, мердігер мекеме директоры:

- Ащысайда, Қаракөлде мектептер салынып жатыр. Үстінен жүк көліктері жүріп жатыр ғой. Қазір арғы жағына асфальт салады. Солар да өтіп жатыр. Солар қоймай езіп тастап жатыр ғой. Ол дейтін төртінші категория жол ғой негізі. Ол жер тек 6 тоннаға есептелген. Басқа да үлкен машиналар үстінен жүріп бұзып жатыр ғой.

Мердігер компания жобада көрсетілген кепілдік міндеттемеге сай жолды жеке қаражатына қайта жөндеуі тиіс. Ойдым-ойдым болған тұстарын күз түскенше жамап береміз деп отыр. Алайда, шалғайдағы ауыл тұрғындары аңсаған жол келер жылы қандай күйде болары белгісіз. Себебі құрылысқа берілген кепілдік мерзімі биыл аяқталады.

Мансұр Есқожин, Айбек Даутов, 24KZ