Арқалық арқылы қатынайтын жүк көліктерінің қатары, бұйыртса, төрт есеге дейін өседі .

Бұл Транскаспий халықаралық көлік дәлізіне тіке шығатын «Астана – Ырғыз», «Жезқазған – Петропавл» республикалық тасжолының жөнделуіне байланысты. Өңірлер арасында логистика жақсарып, кәсіпкерлік саласы дамиды. Қазір Арқалықта жол бойындағы сервистік қызмет көрсетуге арналған бизнес-жобалар талқыланып жатыр.

«Жезқазған – Петропавл» тасжолының құрылысы елдің бірнеше өңірінде жүріп жатыр. Қостанай облысының аумағында 71 шақырымдық жол бөлігі жөнделеді. Ол Ұлытау облысының шекарасынан Арқалыққа дейінгі аралықты қамтиды.

Нұржан Нысанқұлов, мердігер компания өкілі:

-«Жезқазған – Петропавловск – Арқалық» арқылы тас жолы, 290 — 330 км участок. Біздің участок 40 шақырымды құрайды, осы орташа жөндеуді тендер бойынша ұтып алдық.

Жол құрылысына арналған материалдарды тасымалдауға уақыт жоғалтпау мақсатында Арқалықтан асфальт зауыты салынды. Онда күніне мың тоннадан астам құрылыс материалы өндіріледі. Ал «Жезқазған – Петропавл» тасжолы елдің оңтүстік өңірлерінен елордаға қатынайтын жүк көліктері үшін жолды 600 шақырымға қысқартады. Арқалық арқылы болашақта тәулігіне 2,5 мыңнан астам көлік қатынайды.

Роза Танашова кәсіпкер:

-Қазір біздің кәсіпкерлірде ары қарай жақсы, жеңіл жолмен жұмыс жасауға өте көп мүмкіндік бар. Себебі логистика деген кәсіпкерлер үшін өте жақсы ғой. Мысалы, бұрын бізде өте қинындықтар туды. Себебі тауарды бәріміз әкелетінбіз, машина жалдайтынбыз. Қазір барлық жақтан тауар әкелуге қиындықтар болған күнде өте жақсы, жеңіл болады.

«Астана – Ырғыз» тасжолы төселіп біткен соң орталық пен батыс өңірлерді байланыстыратын арақашықтық 560 шақырымға қысқарады. Ол Арқалық пен Торғай арқылы өтеді. Бұл тасжолдың бойында 13 елді мекен орналасқан. Жергілікті тұрғындар жол бойындағы кәсіпкерлік дамиды деген үмітте.

Олжас Өтегенов, Арқалық қалалық кәсіпкерлік бөлімінің басшысы:

-Біздің бір қәсіпкерімізден ұсыныс кеп түсті. Оған қазіргі уақытта жол бойынан жер берілді. Ол жол бойында кемпинг құрылысын бастады. Онда жаңағы екі қабатты жатақханалар болады. Үстінде гостиничный комплекс, жатақхана, астында тамақтанатын орын, көліктерге қызмет көрсету орталықтары болады.

Кәсіпкерлікті дамыту басқармасындағылардың айтуынша, тұрғындардың кемпинг, жанармай құю бекеттерін және дәмханалар салғысы келеді. «Орталық – Батыс» автомагистралінің Амангелді және Жангелді ауданы мен Арқалықтың күретамырына қан жүгіртері сөзсіз.

Ардақ Айбарұлы, Наталья Строкова, Сергей Трахтенберг