Маусым айында заң жобасына мемлекет басшысы қол қойып, нәтижесінде су саласындағы жалақыны көтеруге мүмкіндік алынды.

Елімізде су маманы тапшы, деп хабарлады 31 арнаның Информбюро ақпараттық бағдарламасы.

Қазір салаға екі мыңдай гидролог жетіспейді дейді жауапты министрліктегілер. Ал бұл мәселенің туындауына қызметкерлердің жасы келіп, жаппай зейнетке шығуы себеп болып тұр. Сол үшін "Табиғи монополиялар" туралы заңға өзгеріс енгізілді. Яғни жас мамандарды осы салаға кеңінен тарту үшін жалақы көлемі 35-50 пайызға дейін көтерілген.

Министрлік өкілдерінің айтуынша, сол арқылы 25 мың қызметкердің айлығы энергетика, жылу орталықтарында істейтін жұмысшылардың табысымен теңескен. Ал оқу орындарында гидрология саласы бойынша білім алғысы келетін студентерге гранттар саны да өскен.

Сонымен қатар су шаруашылығы мамандарының біліктілігін арттыру, олардың баспаналы болуына да мемлекет тарапынан қолдау көрсетеміз деп отыр.

"Ағымдағы жылдың маусым айында заң жобасына мемлекет басшысы қол қойып, нәтижесінде су саласындағы жалақыны көтеруге мүмкіндік алынды. 2025 жылы "Жұмысшы мамандықтар" жылы аясында несиелік бағдарламалармен су саласының мамандарына тиімді шарттармен баспана алуға мүмкіндіктер берілді", – деді ҚР СУ және ирригация министрлігінің департамент директоры Ләззат Жүсіпова.