Әлемдік мегажұлдыз Дженнифер Лопестің Астанадағы концертіне 25 мыңнан астам көрермен келеді, деп хабарлайды 24kz.

Соған байланысты қалада жол қозғалысы шектеліп, уақытша қолайсыздықтар туындайды. Музыкалық кештің қауіпсіздігін 1300-ге жуық полицей қамтамасыз етеді. Мерей Қанапияның материалында.

Ертең елорда төрінде көпшілік қызыға күткен Джей Лоның концерті өтеді. Стадион маңында қазірден қарбалас басталып кеткен. Ұйымдастырушылар оның кешіне 25 мың билет сатылғанын айтты. Оның 15 мыңнан астамы шетелдік туристерге бұйырған.

Мәлік Хасенов, «Астана концерт» продюсерлік орталығының басшысы:

- Біз концертке 15 мыңнан астам турист келеді деп болжап отырмыз. Бұл елеулі экономикалық әсер береді. HoReCa (қонақ үй, ресторан және қоғамдық тамақтану) саласына шамамен 6,5 млрд теңге көлемінде кіріс түседі деп күтілуде. Ал салық түсімдері 400 млн теңгеден асады.

Мерей Қанапия, тілші:

- Қазір Астана-Аренаның ішінде концертке дайындық қызу жүріп жатыр. Өкінішке қарай, әнші Дженнифер Лопес пен ұйымдастырушылар арасындағы өзара келісімге байланысты ішке кіре алмаймыз. Себебі түсірілімге тыйым салынған.

Астана қаласы әкімдігі концерт кезінде «Алау» мұз сарайы мен «Сарыарқа» велотрегі жанында жол қозғалысы шектелетінін хабарлады. Бұл шешім кеш қонақтарының қауіпсіздігі мен еркін жүріп тұруы үшін қабылданған. Концерт 19:00 де басталса, стадион есіктері сағат 16:30 дан бастап ашылады.

Мәлік Хасенов, «Астана концерт» продюсерлік орталығының басшысы:

- Әр көрерменнің кіру процесі белгілі бір уақыт алады. Оны 25 мыңға көбейтсек, шамамен 3 сағаттан кем болмайды. Сондықтан үлкен өтініш – алдын ала келіңіздер!

Сондай-ақ қоғамдық тәртіпті қадағалау үшін полицейлер де жұмылдырылады. Саперлар мен кинологтар қазірден тексеріс жүргізіп, қауіпсіздікті күйшейтіп жатыр.

Самат Талғатұлы, Астана қаласы ПД Жергілікті полиция қызметі басқармасының ерекше тапсырмалар жөніндегі аға инспекторы:

- Іс-шара өткізу кезінде қауіпсіздікті қамтамасыз ету мақсатында Ішкі Істер органдарынан 1300-ге жуық қызметкер жұмылдырылады. Елорда тұрғындары мен қонақтарынан қоғамдық тәртіпті сақтауларыңызды сұраймыз.

Одан бөлек қала бойынша шаттлдар ұйымдастырылады. Яғни Астана-Аренаға 5 бағыттан автобустар қатынайды. Олар Астана циркі мен «Хазрет Сұлтан» мешітінен, «QAZAQSTAN» спорт кешені мен Орталық саябақтан және «Бас мешіт» тұрақтарынан қоғамдық көліктер жүреді.

Авторлары: Мерей Қанапия, Мадияр Қындыбаев