Жаңа оқу жылынан бастап Алматы облысының мектептері мен колледждерінде құқықтық мәдениет бойынша қосымша сабақтар өтеді, деп хабарлайды 24kz.

Бағдарлама Президент жариялаған «Заң мен тәртіп» қағидатын қоғамда орнықтыру мақсатында енгізіледі. Сабақтарды арнайы дайындықтан өткен бұрынғы прокурорлар мен полиция қызметкерлері жүргізеді. Алматыда осыған орай бүгін Талғар ауданы білім беру ұйымдарының басшылары мен тәлімгерлерін оқыту басталды. Бұл жоба осы аудандағы 10 мектеп пен 3 колледжде қыркүйек айынан бастап пилоттық режимде іске қосылады. Жобаның мақсаты – жасөспірімдердің құқықтық санасын қалыптастыру, зорлық-зомбылықтың, буллингтің және басқа да тәртіп бұзушылықтардың алдын алу. Қосымша сабақ екі аптада бір рет жүргізіледі. Алдағы уақытта жоба еліміздің өзге өңірлерінде де жалғасын табады деп жоспарлануда.

Аскелен Сатыбалдиев, Құқық қорғау саласының зейнеткері:

- Құқық қорғау саласының мамандары мектептерге қатысып, әртүрлі іс-шаралар өткізіп, лекция оқып және сабақтарын өткізетін болса, мынау қорқытып алушылық, оқушылардың құқықбұзушылық әрекеттерінің алдын алуға болады.