Қазақтың тазылары әлемдік додада топ жарды .

Финляндияда өткен Дүниежүзілік көрмеде 25 мың үздік иттің ішінде құмай тазыларымыз жүлделі орындарға ие болды. Халықаралық іс-шарада халқымыздың жеті қазынасының бірі алғаш рет ресми түрде таныстырылды. Жалпы додаға 8 құмай тазымыз апарылды.

Қазақтың құмай тазысы әлемдік додада алғашқы сайыста-ақ топ жарды. 8 тазының бесеуі өз рингтерінде жүлделі орындарды иеленді. Темірлан атты тазы «2025 жылғы Әлемнің жас чемпионы» аталымы бойынша жеңімпаз атанды. Лашын мен Ару - «Әлем чемпионы», ал Көксерек пен Пана — «Әлемнің вице-чемпиондары» деген атаққа ие болды.

Бауыржан Серікқалиұлы, Қазақстан кинологтар одағының президенті:

- Біздің қазақы тазыны толық деңгейде мойындалу шеңберінде жасалып жатқан өте маңызды қадам. Бүгінгі іс-шарада қазақы тазының тұсаукесері өтіп жатыр. Бұл іс-шара Дүниежүзілік барлық тұқымды иттер көрмесінің шеңберінде өтіп жатыр. Бір-екі күн бұрын Халықаралық кинология федерациясының Бас ассамблеясы өтті. Ол бас ассамблея бізге ерекше іс-шара. Себебі тарихта Қазақстан бірінші рет толыққанды дауыс беруші мүше ретінде қатысты. Дүниежүзілік кинологияның дамуына өз үлесін қосты.

Қазақы тазыны сақтау және таныту туралы шаралар 3 жылдан бері жүргізіліп келеді. Былтыр Амстердамдағы халықаралық кинологиялық федерацияның шешімі бойынша Қазақстан ресми түрде тазы тұқымының иесі деп танылды. Бүгінгі іс-шарада да қазақы тазының шығу тегі, қасиеті туралы кеңінен түсіндірілді.

Гаухар Алимханова, Финляндиядағы «Сәуле» қазақ мәдени қоғамының негізін қалаушы:

- Қазақ тазы иті ол жай ғана ит емес, бүгінгі заманда өте азайып бара жатқан және оны көбейту, сақтап қалу бізге өте маңызды. Себебі тазы ит ол біздің тарихымыз, ата-бабаларымыздан келе жатқан салт-дәстүріміз., мәдениетіміз деп ойлаймын.

Көрмеге қойылған қазақтың киіз үйі, ұлттық нақышта жасалған павильон көпшіліктің назарын аударды. Қонақтар қазақ тазысымен суретке түсіп, оның тарихымен, ерекше қасиеттерімен танысты.

Тамаш Яккель, Халықаралық кинология федерациясының президенті:

- Мен қазақтың тазы тұқымын тарихқа енгізгім келеді. Бұл итті өзінің ұлттық мақтанышы ретінде танитын жандарға алғысымды білдіремін. Көрмеде түрлі иттерді мұқият бақыладық. Соның ішінде тазының сұлулығы, мінезі, адамдармен ерекше байланысы мені тәнті етті.

Халықаралық кинология федерациясының талабына сәйкес, алдағы 10 жылда еліміз тазы санын көбейтіп, халықаралық жарыстарға қатысуға тиіс.

Фариза Жанғанаева, 24kz