0:00:00

Жаңалықтарды Telegram арнамыздан оқыңыз!

Жетпістегі студент әжелердің білімге деген құштарлығы жастардың өзін таң қалдырып отыр. Ақтөбеде «Күміс университет» жобасы аясында 170 зейнеткер тоғыз бағыт бойынша білім алып жүр. Қариялардың өркениет жетістіктерінен қалғысы жоқ, сондықтан көбі «Ағылшын тілі» мен «Цифрлық сауаттылық» пәндерін таңдаған. Мереке қарсаңында білімге құштар аналарымызбен Жақсыбек Кемал жүздесіп келді.

Дариға апа ұзақ жыл бойы білім беру саласында еңбек еткен. Одан бөлек қоғамдық жұмыстарда да өзін мақтаулы маман екенін дәлелдеген. Зейнеткерлікке 10 жыл бұрын шықты. Алайда биылдан бастап университетке келіп, «Цифрлық сауаттылық» бағыты бойынша білім алуда.

Дариға Татыранқызы, зейнеткер:

Өзімнің іс-шарамды салғым келеді. Instagram, Facebook қолданам. Соны балаларға жасап бер демей, әрі қарай заманауи ақпараттарды білейін деп келдім.

Бұл топтағы білім алушылар сандық технологиялар мен әлеуметтік желіні терең меңгеруді көздейді. Өйткені, онлайн саудамен айналысуды жоспарлап отырғандары бар. Осылайша көбі жоғарғы оқу орнына 40-45 жылдан кейін қайта келіп отыр.

Гүлнар Сейтмағамбетова, зейнеткер:

Инстаграмда магазинім бар. Сатамын, сосын түсінік жұмыстарын жүргіземін. Өзім де соны пайдаланып, денсаулығымды күтемін. 1980 жылы бітірдім. Енді 45 жылдан кейін қайтадан студент болып отырмын. Бәрі жастық шақты еске салады.

«Күміс университет» жобасы басталғалы егде жастағы 300-ден аса тұрғын екі жарым айлық курстан өтіп, сертификат алған. Тіпті, екінші рет келіп оқып жатқандары да бар.

Сандуғаш Кәленова, Қ.Жұбанов атындағы аөму қосымша білім беру департаментінің маманы:

Биыл бейімділігіне байланысты 9 бағыт бойынша 170 адамды қабылдадық. Тумалары осындай бір жолдама алып берген жағдайда, шетел тілін білгісі келеді. Сол шетел тіліне сұраныс жоғары.

Зейнеткер-студент атанған әжелер сабаққа аптасына 2 рет келеді. Қолдары қалт еткенде кітапханаға барады, жастармен сөйлеседі. Олардың әлеуметтік желілердегі парақшалары бүгін-ертең жүздерінен шуақ шашқан жандардың суреттеріне толады.

Жақсыбек Кемал