Бұл туралы облыстық денсаулық сақтау басқармасы хабарлады .

Барлығы төрт адам уланған, олардың үшеуі – бала, біреуі – ересек. Барлығы ауруханаға жеткізілді, деп жазады inbusiness.kz сайты басқармаға сілтеме жасап.

Оқиға Мағжан Жұмабаев ауданына қарасты Булаев қаласында өткен "Жастар-2025" спартакиадасының ашылуында болған. Жергілікті тұрғындардың айтуынша, зардап шеккендер мереке өтіп жатқан аумақтағы сауда нүктесінен көше тағамын – болжам бойынша дөнер жеген.

Зардап шеккендер саны бұдан да көп болуы мүмкін, тек кейбіреулері дәрігерге бармай, өз бетімен емделген. СҚО санитарлық-эпидемиологиялық бақылау департаменті аудандық басқарманың бұл іс бойынша тергеу бастағанын хабарлады.

"Эпидемиологиялық тексеріс жүргізу үшін қажетті барлық сынамалар мен сүртпелер алынды. Бүгінгі таңда нәтижелер сараптамада. Алдын ала деректер бойынша, барлық зардап шеккендер 8 тамызда Магжан Жұмабаев ауданы Булаев қаласындағы стадион аумағында орналасқан сауда нүктесінен донер жеген", – деп мәлімдеді баспасөз қызметі.

"Кәмелетке толмағандардың жағдайы тұрақты, орташа ауырлықта, оң динамика байқалады. Ересек науқас та дәрігерлердің бақылауында инфекциялық бөлімде ем қабылдап жатыр, жағдайы орташа ауырлықта", – деді ведомствода.