Сайрам ауданы – Түркістан облысындағы әлеуметтік-экономикалық әлеуеті жоғары өңірлердің бірі.

Ауданның ауыл шаруашылығына бейімді географиялық ерекшелігі, еңбекке бейім тұрғындары мен кәсіпкерлікке жасалған қолайлы жағдай соңғы жылдары жаңа өндіріс ошақтарының көбеюіне серпін берді. Осындай табысты кәсіпорындардың бірі – Қарамұрт ауылындағы «Южанка-5» ЖШС консерві зауыты.

Бұл шағын ғана зауыттың аудан экономикасына қосып отырған үлесі зор. Біріншіден, бұл – ауылдық жерде құрылған өндірістік база. Яғни, қалаға қоныс аудармай-ақ, өз туған ауылында жұмыс істеп, табыс табуға мүмкіндік бар деген сөз. Екіншіден, жергілікті өнім – импортты алмастырудың жарқын үлгісі. Үшіншіден, консерві зауыты маусымдық әрі тұрақты жұмыс орындарын ашып, әлеуметтік тұрақтылыққа үлес қосып отыр. Ал төртіншіден, аудан бюджетіне түсетін салық – жергілікті инфрақұрылым мен әлеуметтік саланың дамуына бағытталады.

2017 жылдан бері жұмыс істеп келе жатқан «Южанка-5» ЖШС бүгінгі таңда өз саласында ерекше көзге түсіп отыр. Жеміс-жидек пен көкөністі өңдеумен айналысатын зауыт консервіленген өнімдердің түрлі түрін – салаттар, тұздалған көкөністер, тосаптар мен шырындарды өндіреді. Айта кетерлігі, бұл өндіріс орны дәстүрлі өнім түрлерімен шектеліп қалмай, жаңа бағыттарға да батыл қадам жасауда.

Зауыттың басты жаңалығының бірі – қарбыз қабығынан тосап дайындау технологиясы. Бастапқыда тәжірибе ретінде қолға алынған бұл өнім бүгінде тұтынушылар тарапынан оң баға алып отыр. Қарбыздың тек ішкі бөлігі ғана емес, қабығы да – дәрумендерге бай пайдалы шикізат екенін дәлелдеген кәсіпорын бүгінде осы бағытта өндірісті ұлғайтуды көздеуде. Бұл тосап ерекше дәмімен ғана емес, экологиялық тазалығымен де ерекшеленеді.

Бұл өндіріс орны – бұрыннан қалыптасқан стереотиптерді бұзып, ауылдық жерде де креативті, ерекше, сапалы өнім жасауға болатынын дәлелдеген кәсіпорын. Тек өнім шығару емес, оны нарыққа бейімдеу, сұранысқа ие ету, әлеуметтік желілер арқылы жарнамалау – бәрі осы зауыттың табанды еңбегі мен дұрыс басқару тәсілінің нәтижесі.

Зауыт жетекшісі Мариям Хамитовна Джексебаева — бұл істің жүрегі. Ол кәсібіне деген жауапкершілікпен қарап, өнім сапасына ерекше мән береді. Оның айтуынша, әр банка – үлкен еңбек пен ұқыптылықтың нәтижесі. Жемістер мен көкөністер таңғы уақытта жинап алынып, түске дейін жуылып, кешке дейін өңделеді. Барлық өнімдер табиғи, ешқандай консервантсыз дайындалады. Бұл – қазіргі тұтынушы үшін басты талап.

«Южанка-5» өнімдерінің тағы бір артықшылығы – дәмінің үйдегі консерва сияқты болуында. Құрамында химиялық қоспалар жоқ, барлығы таза шикізаттан дайындалады. Тіпті, кейбір өнімдердің рецептілері бұрынғы әжелерімізден қалған ұлттық тәсілдерге негізделген.

Қазіргі таңда зауытта тұрақты түрде 5 адам жұмыс істейді. Жаз мезгілінде бұл көрсеткіш еселеніп, маусымдық жұмысшылар тартылады. Ауыл тұрғындары үшін бұл қосымша табыс көзі ғана емес, еңбекке араласудың жолы. Еңбек еткен адам өзін қоғамның бір бөлшегі сезінеді, жауапкершілігі артады. Сондықтан бұл зауыт – экономика ғана емес, әлеуметтік тұрғыда да маңызды рөл атқарып отыр.

Кәсіпорынның орналасқан жері – Қарамұрт ауылдық округі, Х.Нигмаджанов көшесі, №12G мекенжайы. Бұл жерде шағын цех жұмыс істейді. Жергілікті тұрғындар күнделікті осы цехтан өтіп бара жатып, банкаларға құйылып жатқан салаттар мен шырындардың иісін сезеді. Бұл иіс – еңбек иісі. Бұл иіс – ауылдың дамып жатқанының белгісі.

Зауыт болашағын тек ішкі нарықпен шектеп отырған жоқ. Басшылықтың айтуынша, өнімді шетелге – Өзбекстан, Қырғызстан, тіпті Ресей нарығына шығару жоспарланып отыр. Қазіргі таңда бұл бағытта келіссөздер жүргізілуде. Егер бұл мақсат жүзеге асса, онда «Южанка-5» тек аудан емес, бүкіл республика үшін мақтаныш болары сөзсіз.

Сайрам ауданында осындай кәсіпорындардың көбеюі – бұл елді мекеннің дамып жатқанын білдіреді. Бір зауыт – бірнеше отбасының табыс көзі, ауылдың әлеуметтік тынысы, ауданның экономикалық негізі. Ал «Южанка-5» – осының жарқын мысалы.

С.СӘУЛЕБАЙҚЫЗЫ