Іс материалдарына сәйкес, талапкер 2013 жылы АҚШ-та магистратурада оқу үшін "Болашақ" стипендиясын алған, деп хабарлайды inbusiness.kz сайты.

Астананың мамандандырылған ауданаралық әкімшілік соты 2025 жылғы 13 тамызда Boston University түлегінің Ғылым және жоғары білім министрлігін "Болашақ" халықаралық стипендиясынан айыру туралы шешімін заңсыз деп тану жөніндегі талабын қанағаттандырмады.

Түлек оқуын және тағылымдамасын аяқтаған соң, еңбек қызметін бастағанымен, оны Қазақстаннан тыс аумақта жекеменшік ұйымдарда қашықтан атқарған. Сот дерегінше, ол стипендиялық шарттың басты талабын орындамаған – белгіленген мерзімде елге оралмай, Қазақстанда мамандығы бойынша бес жылдық міндетті жұмысын өтемеген. ҰҚК Шекара қызметі оның 2023 жылғы 1 мамырда елден кеткенін және қайта оралмағанын растады.

Хабарламаларға қарамастан, стипендиат шарт талаптарын орындау үшін ешқандай әрекет етпеген. Осы себепті Республикалық комиссия оны стипендиядан айырып, кеткен шығынды өтеуді міндеттеді.

Сот министрліктің шешімін заңды деп танып, бағдарламада қашықтан жұмыс арқылы өтем жасау қарастырылмағанын атап өтті.