Қазақстан Президенті Қасым-Жомарт Тоқаев білім беру жүйесіндегі басты мақсаттардың бірі – қала мен ауыл мектебіндегі білім сапасын теңестіру екенін айтты.

Оның сөзінше, соңғы төрт жылда 4 мыңнан астам мектептің материалдық-техникалық базасы жаңартылып, ауылдағы білім ошақтарына күрделі жөндеу жүргізілген, деп жазады inbusiness.kz сайты.

"Баланың бәрі – бірдей. Ауыл баласы мен қала баласының білім алу мүмкіндігі тең болуы керек. “Келешек мектептері” жобасының негізгі мақсаты да – осы", – деді Мемлекет басшысы.

Президент тәрбие мен білімнің ажырамас байланысына тоқталып, "Адал азамат" атты жаңа біртұтас тәрбие бағдарламасы биылдан бастап барлық мектепте, соның ішінде жекеменшік білім беру ұйымдарында да енгізілетінін хабарлады.

Мемлекет басшысы жастардың отаншыл, еңбекқор, білімпаз болып өсуі үшін "Отбасы – мектеп – мемлекет" ынтымақтастығының маңызын атап өтті. "Еңбексіз игілік болмайды, масылдыққа жол бермеу керек", – деді ол.

Сондай-ақ, Тоқаев "Таза Қазақстан" жалпыұлттық акциясы тек экологиялық емес, ой-сана тазалығын қалыптастыруға да бағытталғанын жеткізді. Оның айтуынша, адалдық пен қайырымдылық қасиеттерін бойына сіңірген азаматтар Әділетті Қазақстанның тірегі болады.