Ақтөбеде бос жұмыс орындары жәрмеңкесі өтті.

Жұмысшы мамандықтар жылы аясында өткен шараға облыстағы ірілі-ұсақты 37 компания қатысты. Жұмыс беруші мен жұмыссыздарды бір алаңда жинайтын мұндай шаралардың нәтижесі жаман емес дейді мамандар. Себебі жыл басынан бері 427 адам бос орындар жәрмеңкесінде жұмыс тапқан.

Медет Досмағамбетов жоғары оқу орнын инженер-механик мамандығы бойынша биыл аяқтады. Тәжрибесі жоқ емес. Университетте оқып жүргенде көлік жөндеу станцияларында өндірістік практикадан өткен. Жәрмеңкеде бірнеше ірі компанияға түйіндемесін тапсырған.

Медет Досмағамбетов, қала тұрғыны:

- Төрт жыл бойы оқыған теориямызды тәжірибе тұрғысынан қолданып, ірі компанияларға жұмыс істеуді көздеп отырмын. Біздің мамандық инженер-механик болғандықтан тек қана сервистерде емес, үлкен компанияларда да жұмыс істеуге болады. Қағаздармен немесе көліктерге қатысты жұмыстарды атқара аламын. Қазір түйіндемемді тастап әрі қарай қалай болатынын көре жатамыз.

Жәрмеңкеде 250 бос жұмыс орны ұсынылды. Тау-кен өндірісінде инженер-техниктер мен жұмысшылар, дәнекерлеушілер мен машинист-операторлар тапшы. Олар жас мамандарды мекеме есебінен қосымша оқуға жолдауға да дайын.

Игорь Давыдов, Тау-кен өндіруші компанияның өкілі:

- Тәжірибесі жоқ жастарды да қабылдай береміз. Университетті биыл бітіргендердің түйіндемелерін міндетті түрде қарастырамыз. Бастапқыда мамандығы бойынша жұмысқа орналаса алады. Егер біліктілігін арттырып, қосымша мамандық игеруге қарсы болмаса компания олардың оқуын төлейді. Зауыттың тәжірибелі мамандары жастарға тәлімгер ретінде бекітіледі.

Жәрмеңкеде жұмыссыздар бос орындар тізімімен танысып, мамандарға мұқтаж компаниялардың өкілдерімен емін-еркін сөйлесе алады. Жұмыс талаптары мен жалақы мөлшері, қызметкерлерді әлеуметтік қамтамасыз ету деңгейі сияқты көкейтесті сұрақтарын қоя алды. Биыл өңірде осындай 7 жәрмеңке өткен.

Ләззат Оразбаева, Жұмыспен қамтуды үйлестіру және әлеуметтік бағдарламалар басқармасының басшысы:

- Жыл басынан бері 500-ге жуық адам жәрмеңкенің арқасында жұмысқа орналасты. Бұл аудандарда да өткізіліп жатыр. 10 күн бұрын оқу орталықтарында да өтті. Негізгі мақсат — қазіргі диплом алып жатқан жастарды жұмысқа орналастыру.

«Enbek.kz» порталына тіркелген облыстағы кәсіпорындарда екі мыңнан астам бос жұмыс орны бар.

Мансұр Есқожин, Айнадин Молдабеков, Айбек Даутов, 24КZ