2025 жылғы тамызда әлеуметтік желілерде америкалық "Симпсондар" мультсериалының "ескі эпизоды" кең тарады. Онда аспанда ұшып бара жатқан ұшақта Ресей туы және "Аляскаға қош келдіңіз, президент мырза" деген жазу көрсетілген. Бұл видеоны "Проверено" фактчекерлері тексеріп көрді, — деп хабарлайды Massaget.kz тілшісі Factcheck.kz-ке сілтеме жасап.

Әңгіме не туралы?

Дональд Трамп Ресей басшысы Владимир Путинмен кездесетінін Кремльде 6 тамызда өткен Путин мен АҚШ-тың арнайы өкілі Стивен Уиткофф арасындағы келіссөздерден кейін жариялаған. Кездесу 15 тамызда Алясканың ең ірі қаласы Анкориджде өтті. Осы шарадан бірнеше күн бұрын әлеуметтік желілерде ұзақтығы 21 секунд болатын бейне үзінді тарап, оны мультсериалдан алынған деп көрсетті.

"Симпсондар" тағы да бәрін алдын ала болжаған. Бір эпизодта Аляска аспанында "Welcome to Alaska Mr. President" деген жазуы бар ұшақ ұшып барады", – деп жазды "Медийка" Telegram-арнасы.

Кейбір авторлар бұл үзінді мультсериалдың 2016 жылғы шығарылымында көрсетілген деп нақтылады.

Фактчекерлер не анықтады?

"Проверено" бұл эпизодтың 2016 жылы шықпағанын анықтады. "You Don’t Have to Live Like a Referee" атты бөлімнің премьерасы 2014 жылғы наурызда өткен. Онда Симпсондар отбасы Бразилияға барады, өйткені Гомерді футболдан әлем чемпионатында төреші болуға шақырған. Бұл эпизодта Аляска да, Ресей президенті де аталмайды.

Шын мәнінде, желіде тараған үзінде апталық эпизодтан емес, 2007 жылы шыққан толықметражды "Симпсондар кинода" фильмінен алынған. Онда Гомердің әрекеті экологиялық апатқа әкеліп, билік Сприңфилд қаласын алып шынымен қаптайды. Қала тұрғындары кінәліні анықтаған соң Симпсондарды жазаламақ болады, бірақ отбасы қоршаудан қашып шығып, кейін Аляскаға қоныс аударады.

Алайда фильмнің түпнұсқа кадрларында ұшақ та, Ресей жалауы бар баннер де жоқ. Сахнада тек Аляскаға тән табиғат көрінісі көрсетіледі. Ал әуеде ұшып жүрген ұшақ бейнеүзіндіге кейін қосылып, монтаждалған.

Контекст

Шілденің басында әлеуметтік желіде "Симпсондар" мультсериалында Ресей мен Әзербайжан арасындағы соғыс алдын ала болжанған деген ақпарат тарады. Бұл хабарламалармен қатар видео да жарияланды. Видеода кадр сыртындағы мәтінде 19-маусымның бір эпизодында 2025 жылғы тамызда соғыс басталуы мүмкін екені көрсетілгені айтылады. Factcheck.kz ақпараттың рас-өтірігін тексерді.

Қызықты жаңалықтар мен видеоларды көру үшін TikTok арнамызға жазылыңыз!