Алдағы уақытта бір азаматқа қанша шаршы метр тиесілі екені заң жүзінде белгіленбек.

Премьер-Министрдің орынбасары – Ұлттық экономика министрі Серік Жұманғарин Астана пәтерлерінің бірінде 800-ден астам адам тіркелгенін айтты, деп хабарлайды inbusiness.kz сайты.

Мәжілісте "Қазақстан Республикасының кейбір заңнамалық актілеріне астананы және республикалық маңызы бар қалаларды дамыту мәселелері бойынша өзгерістер мен толықтырулар енгізу туралы" заң жобасы жөнінде бірінші оқылымда қаралды. Құжат жер қатынастары, сәулет, құрылыс, көші-қон, жарнама, экология және т.б. салалардағы мәселелерді шешуге бағытталып, 1 Кодекспен 6 Заңға түзетулер енгізуді көздейді.

Заң жобасын таныстырған Ұлттық экономика министрі Серік Жұманғарин елордадағы көші-қон процестерін реттеу мәселесіне тоқталды.

"Әлемдегі ірі қалаларда сапалы білім мен медицина, дамыған инфрақұрылым, инновациялар мен технологиялар шоғырланған, бұл өз кезегінде тез урбанизацияға әсер етеді. Осы процесс елімізге де тән. Қазіргі уақытта халық ірі қалаларда өмір сүруге талпынуда, бұл пәтерлерде тұрғындардың санын шектеусіз тіркеу проблемасына алып келді. Тәжірибе көрсеткендей, тұрғын үй иелері үйінде нақты тұрмайтын жүздеген азаматтарды тіркеу фактілері бар. Астана қаласының пәтерлерінің бірінде 800-ден астам адам тіркелген. Жалпы айтқанда, 924 осындай мекенжай анықталды", – деді Жұманғарин.

Үкімет басшысының орынбасары осы мәселені шешу мақсатында бірқатар ұсыныс айтты:

• елорда аумағында тұрақты және уақытша тұратын жері бойынша тіркеу нормативін бекіту, яғни мәслихатпен алдағы уақытта бір азаматқа қанша шаршы метр тиесілі екені белгіленетін болады;
• астана аумағында бір мекенжайда нормативтерден артық тіркеуге тыйым салу бойынша өзгерістер енгізу ұсынылады.

"Бұл ретте, тіркеу нормативтері тұрғын үйдің меншік иесінің және жұбайының жақын туыстарына қолданылмайтынын атап өтеміз. Сондай-ақ, Әкімшілік құқық бұзушылық туралы кодексіне өзгерістер мен толықтырулар енгізу аясында тұрғын үйлерде тіркелген және тұрмайтын жеке тұлғаларды тіркеуден шығармағаны үшін тұрғын үй иесіне жауапкершілік күшейтілетін болады", – деді Ұлттық экономика министрі.