Елімізге танымал меценат , кәсіпкер Айдын Рахымбаев өзі басқарып отырған құрылыс компаниясының салық төлемейді деген айыбына қатысты мәлімдеме жасады.

Ол компания жыл сайын 20-25 рет тексерілетінін атап өтті, деп хабарлайды Caravan.kz медиа порталы.

Айдын Рахымбаев ресми мәлімдемені өзінің желідегі парақщасында жасады.

«Құрметті клиенттер, серіктектестер мен менің оқырмандарым!

Өткен аптада BI-дың төленбеген салығы туралы айтыла бастады, жақын арада ресми ақпарат айтылуы тиіс, бірақ мен осы мәселеге қатысты мәлімдеме жасайын деп едім. Апта бойы Қаржы министрлігі мен Үкіметте кездесулер болды, біз осы жағдай мен құрылыс саласы төңірегіндегі өзекті мәселелерді талқыладық. Бастапқы ақпарат бұрмаланып, басшылыққа дұрыс жеткізілмеуі мүмкін.

Анықталғандай, салық жүктемелерінің көпшілігі BI-дан төлем алатын әрі арнайы салық режимін қолданатын біздің мердігерлерге қатысты болған. БАҚ-та аталып өткен 11,9 млрд теңге — бұл біз төлемеген салық мөлшері емес, бұл сома BI-мен жұмыс істеген шағын компаниялардың жалпы ақша айналымы болып отыр. Осы айналымдағы ақшадан салық мөлшері есептелуі тиіс. Ал, бұл өздеріңіз түсініп отырғандай, мүлдем басқа сома.

Кез келген құрылыс компаниясы сияқты біз де мердігерлермен жұмыс істейміз, олардың ақша айналымын әрине бізбен байланыстырады. Алайда, біз құзырлы органдармен бірге аталған мәселе бойынша жұмыс жасап жатырмыз.

Мұндай мәселелерде біздің компанияның беделіне нұқсан келтіріледі, сол себепті біз мұндай жағдайлардың қайталағанын қаламаймыз… Біз жыл сайын салық тексерулерін қоса алғанда, 20-25 тексеруден өтетінімізді ерекше айтқым келеді. Одан бөлек, «Үлкен төрттікке» кіретін халықаралық компаниялардың аудитінен өтеміз және Fitch рейтингіміз де жоғары. BI Қазақстанның жеке компаниялары арасында ірі салық төлеушілердің үздік ондығына кіреді.

Соңғы үш жылда біз шамамен 155 млрд салық төледік, алдағы үш жылда бұл сома шамамен 250 миллиард теңгеге дейін өседі», — деп мәлімдеді компания басшысы.