Қуаты 250 ваттан жоғары және жылдамдығы сағатына 25 шақырымнан асатын электровелосипедттер тіркеуден өтуі тиіс. Мұндай көлік құралы мопедпен теңестірілген. Сондықтан есепке қойып, техпаспорт, мемлекеттік нөмір және сақтандыру полисін алу керек.

Ал жүргізушіде «А» санатындағы куәлігі болуға тиіс. Қазір алматылық тәртіп сақшылары түсіндіру жұмыстарын жүргізіп жатыр. Оны елемеген жағдайда құжатсыз жүргендерге айыппұл салынып, көліктері арнайы тұраққа қойыла бастайды. Жыл басынан бері Алматыда мопедтің қатысуымен 500-ден аса жол апаты болған. Ал электросамокат пен электровелосипедтің иелері 12 мыңға жуық құқықбұзушылық жасаған. Бұл туралы брифингте полиция қызметкерлері хабарлады.

Айдын Меркімбаев, қалалық ПД ӘПБ процессинг орталығының бастығы:

- Алматы қаласы бойынша 18 мыңға жуық мопед тіркелген. Ол жұмыс қазір де жүргізілуде. Қазіргі таңда Алматы қаласы және тұрғындары өзінің көлігінің сипаттамасын қарастырып, егер бұл мопед немесе мопедке ұқсас құрылғы болса, тіркеуге шақырамыз.