Қаржылық, инфрақұрылымдық және институционалды капиталды дамыту.

Биылғы Astana Finance Days форумында осы үш негізгі бағыт қамтылды. Сегізінші рет ұйымдастырылып отырған іс-шараға қаржы, инвестиция, финтэк саласының белді сарапшылары шақырылған. Форумға 70-тен астам елден 5 мыңнан аса қатысушы тіркеліпті.

Сегізінші мәрте ұйымдастырылып отырған форумда отандық қаржы нарығына қатысты көп жаңалық айтылды. Мәселен, криптовалютаға негізделген Солана инвестициялық қоры Астана халықаралық қаржы орталығында ірге тебеді. Сондай-ақ Алматы өңірінде вольфрам өндіретін компанияның IPO-сы Гонконг пен Астана халықаралық қаржы орталығының биржасында орналастырылмақ. Бұл қос биржада юаньмен саудаланатын алғашқы IPO. Бүгіннің өзінде қаржылық құралға ұсынылған бастапқы баға 3 есеге өскен. Бұның өзі шикізат өндірушіге деген сенім мен қызығушылықты білдірсе керек. Аймақтарға да капитал тартуға ден қойылған.

Ренат Бектұров, АХҚО басқарушысы:

- Мақсат экономикаға инвестиция түрлерін тарту әсіресе, қаржы нарығы арқылы. Біз өзіміздің аймақтарға да капитал тартуға көмектесіп жатырмыз. Бұл Ақтөбе облысының әлеуметтік облигацияларын шығарды. Яғни облыс өзі шығарып, оны әлеуметтік саладағы жобаларға осы қаржыны жұмсамақ.

Кристофер Кэмпбелл-холт, АХҚО соты мен ХТО атқарушы директоры:

- Аcтана халықаралық қаржы орталығының соты мен халықаралық төрелік орталығының басшысы ретінде айтарым, бұл форумның мақсаты – серіктестерге сенім ұялату. Ағылшынның заңы мен жаһандық стандарттарға сай құқықтық реттеу жүйесі орнатып, әлемдік деңгейдегі сот төрелігін құрдық. Бұл әлбетте инвесторлардың құқығын қорғау үшін арналған. Сол себепті инвесторлардың Қазақстанға деген қызығушылығы артып келеді. Оған қоса, ел үкіметінің технологияға құшағы ашық. Аcтана халықаралық қаржы орталығы жоғары технологияны бейімдеп қана қоймай, сондай технологияны құруға көмектеседі.

Қазақстандықтардың криптовалютамен де есеп айырысатын күні алыс емес. «Астана» халықаралық қаржы орталығының Қаржылық қызметтерді реттеу жөніндегі комитеті Астана файнанс дэйс форумында стейблекойндарды таныстырды. Бұл АҚШ долларына байланған төлем жасау тетігі. Осы бір механизмді біздің нарықта іске қосу үшін комитет Bybit Limited компаниясымен өзара түсіністік туралы меморандумға қол қойды.

Евгения Богданова, АХҚО қаржылық қызметтерді реттеу жөніндегі комитетінің бас директоры:

- Бүгінгі меморандумның игілігін ең алдымен Астана халықаралық қаржы орталығының қатысушылары көретін болады. Бұл бір пилоттық жоба іспеттес. Алдағы уақытта қарапайым халық та оған қосылуы бек мүмкін. Ол не береді? Ол алдымен қаржы орталығының қатысушылары қандай да бір сервисттік қызметті стэйбл-койндармен төлеу мүмкіндігіне ие болады. Яғни, ұлттық не басқа валютамен емес, цифрлық активінің есебінен төлем жүргізе беретін болады.

Айта кету керек, соңғы жылдары цифрлық активтердің жүйесінде стейблкойндардың рөлі айтарлықтай артқан. CoinDesk деректеріне сәйкес, олардың нарықтық капитализациясы биыл маусымда 251 млрд АҚШ долларынан асты. Сарапшылар ертең де қаржылық технология және тұрақты дамудың жаңа мүмкіндіктері мен тың өнімдерді басқару тәсілдерін талқылайды.