Экономикалық қылмысқа және сыбайлас жемқорлыққа қарсы күрес агенттігінің бұрынғы төрағасы Қожамжаровқа қатысты сотқа дейінгі тергеу басталды, деп хабарлайды Бас прокуратураға сілтеме жасаған KAZ.NUR.KZ.

"Экономикалық қылмысқа және сыбайлас жемқорлыққа қарсы күрес агенттігінің бұрынғы төрағасы Қ.П. Қожамжаровқа қатысты лауазымдық өкілеттіктерін асыра пайдалану, сондай-ақ ол басшылық лауазымдарда болған әр түрлі кезеңдерде қылмыстық жолмен алынған ақшаны заңдастыру фактілері бойынша сотқа дейінгі тергеп-тексеру басталды.

Барлық қылмыстық іс бойынша арнайы прокурорлардың жетекшілігімен жедел-тергеу топтары құрылды", — делінген Бас прокуратура хабарламасында.

Қазақстан қылмыстық-процестік кодексінің 201-бабына сәйкес өзге ақпарат жария етілмеді.

Қазақстан Республикасы парламенті сенатының сайтындағы ақпаратқа сәйкес, Қайрат Пернешұлы Қожамжаров әр жылдары Экономикалық қылмысқа және сыбайлас жемқорлыққа қарсы күрес агенттігінің төрағасы, Ақмола облысының әкімі, президенттің көмекшісі – Қазақстан Республикасы Қауіпсіздік кеңесінің хатшысы қызметтерін атқарған.

2014-2015 жылдары Қазақстан Республикасы Мемлекеттік қызмет істері және сыбайлас жемқорлыққа қарсы іс-қимыл агенттігінің басшысы болды.

2015-2017 жылдар аралығында Қазақстан Республикасы Мемлекеттік қызмет істері министрлігінің Сыбайлас жемқорлыққа қарсы іс-қимыл ұлттық бюросының төрағасы қызметін атқарған.

Ал 2017-2019 жылдары Қазақстан Республикасының Бас прокуроры болды.

2019 жылы ол сенат депутаты атанды, бірақ 2023 жылы сенат құрамынан шықты.

Мәтіннен қате тапсаңыз, бізге жазыңыз