Қыркүйек айының алғашқы жексенбісі, яғни бүгін — мұнай және газ саласы қызметкерлерінің кәсіби мерекесі.

Елде бұл салада 200 мыңнан астам адам қызмет атқарады. Олардың қатарында кәсібі атадан балаға жалғасқан мәуелі мұнайшылар әулеттері бар.

Нұрлыбек Есмахамбетов мұнай-газ саласында 20 жылдан бері еңбек етіп келеді. Кәсіби жолын қарапайым оператор болып бастаған ол бүгінде бүтін бір бөлімді басқарып отыр. Табандылық пен ізденіс биік белестерге жеткізеді. Мамандығын мәртебесі санайтын Нұрлыбек осылай дейді. Ол екі жыл Канадада жұмыс істеген. Енді міне жиған білімін ел кәдесінде жаратып жүр.

Нұрлыбек Есмахамбетов, мұнай-газ өндіру бөлімінің басшысы:

- Өзіңізге белгілі, біздің жұмыс физикалық тұрғыда қиын. Мұнайымыз бар, газымыз бар. Бәрі жарылғыш заттар. Жеңіл өртенетін заттар. Техникалық қауіпсіздікке үлкен көңіл бөлеміз. Қазіргі стандарттарға, сұраныстарға сәйкес техникалық қауіпсіздікті сақтай отырып, өз мұнайымызды өндіріп жатырмыз.

Өндірістің өрге басып, өркендей түсуіне өз үлесін қосып жүргендердің бірі — ақтаулық Жасұлан Есбаев. Кен орнындағы

әр көліктің сырын білетін жан бұл салаға 25 жылын арнаған. Шебер әріптестерімен бірге әр ауысымда 100-ден аса техниканың жай-күйін мұқият қадағалайды. Олардың қатарында құрылымы күрделі алып машиналар да бар.

Жасұлан Есбаев, жөндеу-механикалық цехының шебері:

- Сервистік қызмет көрсету дегеніміз майлау, майын төгу. Көлік маманы өндіріс саласына ең керекті мамандық. Соны шама келгенше сапалы, жүйелі түрде механиктермен тығыз байланыста отырып атқарамыз. Күнделікті кестеге сай жолға, жұмысқа дайындаймыз.

Күн түгілі, сағат санап технология жаңғырған заманда мұнайшылар да жұмыс істеудің тың тәсіліне көшкен. Бүгінде бұрынғы көп тірлік бір ғана тетіктің көмегімен атқарылады. Десе де бұл жандардың барлығына ортақ бір дүние бар. Ол өз ісіне деген шексіз махаббат. Жалпы, елімізде мұнай-газ саласында 200 мыңнан астам адам еңбек етеді. Маңдай терімен ел табысын еселеп жүрген олардың қай қайсы да зор құрметке лайық.

Назерке Тоқжан, Асланбек Шығыров, 24KZ