Мемлекет басшысы кешегі Жолдауында жергілікті атқарушы органдарға туристік инфрақұрылымды жан-жақты дамытуды тапсырды. Президенттің бұл нұсқауын сарапшылар құптай отыра, салалық заңнамаға бірқатар өзгерістер мен толықтыруларды ұсынып отыр.

Бақыт Топтаева, тілші:

- Бұдан былай туризмге қажетті инфрақұрылымды жан-жақты дамыту жергілікті атқарушы органдардың мойнында. Мемлекет басшысының Жолдау аясындағы тікелей тапсырмасы осындай. Демек, облыстық әкімдік деңгейінде салаға жауаптылар белгіленіп, аймақты туризм тұрғысынан тартымды етуге қажетті шараның бәрі қолға алынуы тиіс. Себебі салада қордаланған мәселе жетіп артылады. Өңірлерге сапары кезінде депутат Екатерина Смолякова түйткілдерді талдап қайтқан еді. Түйгені мынау:

Екатерина Смоликова, ҚР Мәжілісінің депутаты:

- Шын мәнінде жергілікті атқарушы органдарға басымдық етіп, Президентіміздің артып жатқаны өте орынды деп санаймын. Себебі сенесіздер ме, көп облыстарда, соның ішінде Жетісу облысында Туризм басқармасы жоқ. Қалай? Алты-ақ облыста Туризм басқармасы бар екен. Басқа облыстарда туризм бағыты басқа басқармалар департаменттердің құрамындағы 12-ші, 15-ші бағыты екен.

Бақыт Топтаева, тілші:

- Туризмге аса қатты мән берілмей келгендігі, міне, осыдан-ақ білінеді. Саланы басқарудағы олқылықтың тағы бірі – елдегі визит орталықтарының жеткіліксіздігі. Елдегі бар болғаны 12 визит орталығы жұмыс істейді. «Мәселен, маңғаз Маңғыстаудағы туризмнің ақмаржаны саналатын Ақтау қаласында ондай орталық атымен жоқ болып шықты», — дейді депутат.

Екатерина Смоликова, ҚР Мәжілісінің депутаты:

- Осы визит орталықтарын біз әртүрлі атаймыз. Кей облыстарда «ақпараттық бюро» дейді, кей облыстарда «ақпараттық нүкте» дейді. «Визит орталығы» дейді. Әртүрлі атайды. Себебі заңда бұл орталықтардың функциялары тарқатылып жазылмаған, анықтамасы берілмеген. Заңнамалық тұрғыдан біз реттеуге кірісуіміз керек.

Бақыт Топтаева, тілші:

- Сонымен бірге Мемлекет басшысы туризмге жауапты орталық органдарға туристік саясатты ширатуды тапсырды. Яғни олар Қазақстанның сырттағы жарнамасы мен маркетингісін жүргізіп, ортақ түйткілдің оңтайлы шешімін қабылдауға міндеттеледі. Осыған қатысты жоспар жоқ емес, «Қазақ Туризм» ұлттық компаниясының өкілі.

Әлішер Тұрсын, «Kazakh tourism» ҰК АҚ департаментінің директоры:

- Дәл қазіргі уақытта өте бір маңызды заңнамалық өзгерісті күтіп отырмыз. Бұл – агротуризм атты түсініктің енуі. Агротуризм бұл жергілікті жерде ауыл шаруашылығымен айналысып жүрген мамандарға, қожалықтарға туристерді қабылдауға, оларға әртүрлі экспериенс, әртүрлі мүмкіндіктер жасауға мүмкіндік береді. Жаңағыдай, агро аймағында қонақтарға түнеуге де мүмкіндік береді. Яғни жерінің мақсатын өзгертпей-ақ туризммен айналысуға, қосымша табыс табуға мүмкіндік береді.

Бақыт Топтаева, тілші:

- Агротуризмге шындап кірісер болса, елдегі 200-ден астам шаруа қожалығында 15 мыңнан астам адам жұмыспен қамтылмақ. Жалпы Қазақстанның ішкі туризмінде оң динамика байқалады. Халық жазғы маусымда Балқаш, Алакөлдің жағасында демалуға асық. Жан-жақты ойластырылған жүйелі инфрақұрылым, сапалы қызмет пен кәсіби кадр және оңтайлы баға саясаты. Халықтың осы бір қажеттілігін өтеуге жергілікті әкімдіктер жағдай жасаса, елдегі туризм жаңғыра түспек. Сондай-ақ Мемлекет басшысы Жолдауда тапсырғандай, таулы Алматы облысында шаңғы туризмін тартымды ете түсуге заманауи инфрақұрылым салынса, отандық курорттарымыз ұлттық брендке айналары сөзсіз.

Авторлары: Бақыт Топтаева, Марат Диханбаев