Қарағанды облысында мүгедектігі бар жандарға, көпбалалы отбасыларға және балалар үйінің тәрбиеленушілеріне тиесілі пәтерлер басқа адамдарға заңсыз жалға беріліп келген. Сонымен қатар бос тұрған пәтерлер де анықталды, деп хабарлайды KAZ.NUR.KZ облыстық прокуратураға сілтеме жасап.

Құзырлы орган өкілдерінің мәліметінше, Балқаш қаласының прокуратурасы халықтың әлеуметтік осал топтарын тұрғын үймен қамтамасыз ету мәселесі бойынша тексеру жүргізді.

"Тексеру барысында мемлекеттік тұрғын үйлерді заңсыз пайдалану деректері анықталды. Балалар үйінің тәрбиеленушілеріне, мүгедектерге және көпбалалы отбасыларға тиесілі пәтерлерде келісімшартсыз тұру фактілері тіркелді. Сонымен қатар ұзақ жылдар бойы жалға беріліп келген және бос тұрған пәтерлер де анықталды", — делінген хабарламада.

Тексеру нәтижелері бойынша прокуратура қала әкіміне ұсыныс енгізді. Прокурорлардың пікірінше, аталған заң бұзушылықтардың себебі – жауапты лауазымды тұлғалардың әрекетсіздігі және тиісті бақылаудың болмауы.

Қабылданған шаралардың нәтижесінде азаматтардың құқықтары қалпына келтірілді. Балқаш қаласының әлеуметтік осал санатындағы екі тұрғыны — жетім бала және жалғызбасты ана заңды тұрғын үйге ие болды, басқа пәтерлер бойынша құжаттарды ресімдеу жүмыстары жүргізіліп жатыр.

Бүгінгі таңда әкімдік тұрғын үй қорын түгендеу жұмыстарын қолға алды.

Мәтіннен қате тапсаңыз, бізге жазыңыз