Ұлттық құраманың капитаны Айбек Оралбайға 1/2 финалда мықты қарсылас түсті. Ол екі дүркін Олимпиада чемпионы, кубалық Хулио Сезар ла Круспен кездесетін болды.

Ливерпульде өтіп жатқан әлем чемпионатында ширек финалдық жекпе-жектерден кейін 6 қазақстандық боксшы жарыс жолын аяқтады. Ағайынды Сабырхандар сенімді жеңіске жетіп, жартылай финалға өтті. Ал Нұрбек Оралбай күтпеген жерден өзбек боксшысына есе жіберді.

55 келіде Махмұд Сабырхан жапониялық Руи Ямагучиді 5:0 есебімен жеңіп, жартылай финалға жолдама алды. 70 келіде Төрехан Сабырхан франциялық Макан Траореден басым түсіп, 5:0 есебімен жеңіске жетті. Ол 13 қыркүйекте өтетін жартылай финалда жұдырықтасады. +80 келіде Елдана Талипова жаңа зеландиялық Селин Даниэльді 4:1 есебімен ұтып, 12 қыркүйекте жартылай финалда польшалық Агата Кацмарскамен кездесетін болды. 51 келіде Алуа Балқыбекова тайпейлік Иксуан Гуоны 5:0 есебімен жеңді. 65 келіде Аида Әбікеева Олимпиада чемпионы түркиялық Бусеназ Сурменелиден басым түсіп, 5:0 есебімен жартылай финалға шықты. Оның 13 қыркүйектегі қарсыласы Қытай мен Испания арасындағы кездесуде анықталады. 60 келіде Виктория Графеева өзбекстандық Ситора Турдыбекованы 4:1 есебімен жеңді. Аса ауыр салмақта Айбек Оралбай хорватиялық Лука Пратлажачичті 5:0 есебімен ұтып, әлем чемпионатының жартылай финалына жолдама алды.

Ал бірнеше спортшымыз жарыстан шығып қалды. 57 келіде Карина Ибрагимова польшалық Джулия Сереметаға 2:3 есебімен жол берді. 80 келіде Гүлсая Ержан аустралиялық Есета Флинтке 0:5 есебімен есе жіберді. 90 келіде Сағындық Тоғамбай өзбекстандық Турабек Хабибулаевқа 0:5 есебімен жеңілді. 80 келіде Нұрбек Оралбай өзбек боксшысы Джавохир Умматалиевтен 0:5 есебімен ұтылды. 60 келіде Бибарыс Жексен Олимпиада чемпионы Абдумалик Халоковқа 0:5 есебімен есе жіберді. 65 келіде Ертуған Зейнулинов Олимпиада чемпионы Асахуджа Муидинхуджаевтан 0:5 есебімен жеңілді.

Өзге де құрамалардың жекпе-жектеріне тоқтала кетсек.

Ерлер арасында 70 келіге дейінгі салмақта Өзбекстан құрамасынан Шавкатжон Болтаев Азия чемпионаты мен Азия ойындарының жүлдегері, иорданиялық Зейяд Ишаишке 0:5 есебімен есе жіберді. Әйелдер арасында Феруза Қазакова (51 кг) мен Навбахор Хамидова (65 кг) жартылай финалға жолдама алды. Ал "Баходир Жалоловтың ізбасары" саналатын аса ауыр салмақтағы (+90 кг) Жахонгир Зокиров норвегиялық Мохамед Омар Шихтан айқын басым түсті — 5:0.

Әзербайжан атынан өнер көрсетіп жүрген, тегі өзбек Саиджамшид Жафаров 75 келіге дейінгі дивизионда украиналық Павел Илюшаны 5:0 есебімен ойсырата жеңді.

Қырғызстан өкілі Ихтияр Нишонов 70 келіге дейінгі салмақта жартылай финалға шыға алмады. Ол әлем және Азия ойындарының чемпионы, жапониялық Сэвон Окадзавеге 1:4 есебімен жол берді.

Куба құрамасының басты жұлдыздары Эрисланди Альварес пен Хулио Сезар ла Крус ширек финалда табысты өнер көрсетті. Альварес 65 келіге дейінгі салмақта ирандық Али Хабибинежадты ойсырата жеңді (5:0), ал Ла Крус аса ауыр салмақта (+90 кг) ағылшын Дамар Томастан басым түсті (5:0).

Қалған ширек финалдық жекпе-жектер жұма, 12 қыркүйекте өтеді. Әлем чемпионаты-2025 жартылай финалдары жұма және сенбіге жоспарланған, ал финалдық айқастар жексенбі, 14 қыркүйекте өтеді.