СҚО тұрғыны Әсет Шайкин балық аулап жүріп мамонт жіліншігін тауып алып, оны белгілі археологқа тапсырған, деп хабарлайды Ғылым және жоғары білім министрлігіне сілтеме жасаған KAZ.NUR.KZ.

Ведомствоның мәліметінше, Қозыбаев университетінің профессоры, тарих ғылымдарының кандидаты Анатолий Плешаков Солтүстік Қазақстан облысы Қызылжар ауданындағы Бәйтерек ауылы маңынан табылған бірегей жәдігер – мамонт жіліншігін көпшілікке таныстырған.

Бұл жіліншікті Солтүстік Қазақстан облысының тұрғыны Әсет Шайкин балық аулап жүріп кездейсоқ тауып алған. Кейін әйгілі археолог Анатолий Плешаковқа тапсырып, бірге табылған аумақты зерттеген. Тарихшының айтуынша, ежелгі жануардың қалған бөліктері топырақ қабаттарының астында болуы мүмкін.

"Табылған олжаның ұзындығы 1 метрге жуық өте ірі жануарға тиесілі. Оның жасын біз жоғарғы палеолит дәуіріне жатқызамыз. Бұл шамамен 15 мың жыл бұрын. Бұған дейін Солтүстік Қазақстан облысының аумағынан ежелгі жануарлардың қалдықтары табылған. Келесі жылы табылған жерден шұңқыр қазып көреміз. Егер сол жерден қаңқа мен құрал-саймандарды тапсақ, бұл біздің аумақтағы алғашқы палеолит ескерткіші болмақ", — деді Анатолий Андреевич.

Айта кетейік, Анатолий Плешаков солтүстік қазақстандық археологиялық экспедицияны басқарып келеді. Оның құрамында ғалымдардан басқа Қозыбаев университетінің тарихшы-студенттері бар.

Биыл олар екі көне ескерткіш – Солтүстік Қазақстан облысындағы Ботай және Ақ-Ирий елді мекендерінде жұмыс істеген. Келесі археологиялық маусым зерттеушілерге жаңа ғылыми жаңалықтар ашуға мүмкіндік бермек.

Мәтіннен қате тапсаңыз, бізге жазыңыз