Непалда "Z буыны" көшбасшылары жаңа саясат талап етті.

Непалдағы үкіметтің отставкасынан кейін уақытша премьер-министр болып 73 жастағы Сушила Карки сайланды, деп хабарлайды BBC.

Каркидің айтуынша, ол бұл қызметті атқаруды жоспарламаған, бірақ халықтың наразылығы мен талаптарынан кейін амалсыз қабылдаған.

"Мен бұл орынға жайғасқым келмеп еді, бірақ көшедегі жанайғайдан соң амалсыз қабылдауға тура келді", – деді ол.

Жоғарғы соттың бұрынғы төрайымы болған Сушила Каркидің кандидатурасын жастар наразылығының көшбасшылары ұсынған. Discord платформасында ұйымдастырылған онлайн дауыс беру барысында ол негізгі үміткерлер арасынан таңдалып, кейін президент пен қарулы күштердің қолбасшысы мақұлдады.

Оқи отырыңыз: Әлеуметтік желіні бұғаттау қалай мемлекеттік төңкеріске әкелді? Непалда не болып жатыр

Еске салайық, өткен аптада әлеуметтік желілерді бұғаттау және жемқорлыққа қарсы шараларға наразы халықтың екі күнге созылған толқулары кезінде 72 адам қаза болды. Премьер-министр Кхадга Прасад Шарма Оли отставкаға кетсе де, демонстрациялар жалғасып, бірнеше саясаткердің үйлері қиратылып, парламент ғимараты өртелді.

Сушила Карки – Непал Жоғарғы сотын басқарған алғашқы әйел, енді ел тарихындағы алғашқы әйел премьер-министр атанып отыр. Ол бұрын жемқорлыққа қарсы күрескер ретінде танылып, қызметтен кеткен соң "Судья" және "Түрме" атты кітаптар жазған.