Жезқазғанда теміржол өткелдерінің үстіне салынған көпірлер түгел тозған.

Әсіресе, қаланы өндірістік аумақпен жалғайтын жол өткелі қираудың аз-ақ алдында тұр. Жергілікті билік мәселені келер жылы толық шешеміз дейді. Ескі нысанды сүріп тастап, оның орнына қаланы айналып өтетін жаңа жол салынбақ. Әкімдік сонымен қатар шаһардағы жөндеуді қажет ететін 4 көпірді алдағы екі-үш жылдың ішінде толық жаңартуды жоспарлап отыр.

Теміржол үстімен өтетін бұл көпір қаланы өндірістік аумақпен жалғап жатыр. Қызылордадан Қарағандыға қатынайтын ауыр жүк көліктері де осы жермен жүреді. Жеңіл көліктер ортадағы ойықты айналып өтіп, амалдап жүр. Ал «ауыр техникаға шыдас бермей опырылып кетуі мүмкін», — дейді жүргізушілер.

Нұрбол Садықов, қалалық Автомобиль жолдары мен жолаушылар көлігі бөлімінің басшысы:

- Қарағандыдан кіреберіс жолға бір көпір салынды. Ол жерде көліктер үшін жол ашық. Енді әуежай мен Қызылорда жолына шығар тұста тағы бір көпірдің құрылысы аяқталмай тұр. Биыл соған сметалық құжат жасалды. Мемлекеттік сараптамадан сәтті өтсе, қажетті қаржыға өтінім береміз. Сол көпірдің құрылысы аяқталған соң мәселе толық шешіледі.

Тұрғындарды алаңдатып жүрген тағы нысан Бөгенбай шағын ауданымен жалғайтын мына көпір. Халық арасында «Бүкір көпір» аталып кеткен өткелдің де күйі кетіп тұр. Осыдан оншақты жыл бұрын жөндеу жүргізілген. Бірақ түрлі себеппен аяқсыз қалған.

Нұрбол Садықов, қалалық Автомобиль жолдары мен жолаушылар көлігі бөлімінің басшысы:

- Сәтбаев көшесі арқылы Бөгенбай шағын ауданына баратын көпірдің жөндеу жұмыстарын аяқтауға тағы 1,4 млрд теңге қажет. Сметалық құжат жасалды. Жыл соңына дейін қаржыландыру мәселесін шешуіміз керек.

Жалпы қалада теміржол үстімен өтетін 6 көпір бар. Соның 4-еуіне күрделі жөндеу қажет. Сала басшыларының айтуынша оларды жаңарту алдағы екі-үш жылдың ішінде толық аяқталмақ.

Авторлары: Елдос Кәкенов, Нұрбол Үздікбаев, Нұрлан Исмаилов