Жамбыл облысында Қаңлы мәдениетіне тән құнды жәдігерлер табылды, деп хабарлайды 24KZ телеарнасына сілтеме жасаған KAZ.NUR.KZ.

Арна тілшісінің хабарлауынша, Байзақ ауданындағы Жайлаутөбе қалашығындағы қазба жұмыстары үш жыл бұрын басталған.

Көне қалашықтағы археологиялық зерттеу жұмыстарын Әлкей Марғұлан атындағы Археология институтының жетекші ғылыми қызметкерлері жүргізіп жатыр. Олардың болжамынша, көне шаһардың аумағы 5 гектарға жеткен. Ал қала сырты, биіктігі 7 метр, қалыңдығы 5 метр болатын екі қабатты қорғанмен қоршалған.

Қазба жұмыстары кезінде екі қабатты қорғанның жоғарғы бөлігінен екі бөлме анықталған. Ғалымдар бұл күзететін жауынгерлер үшін салынған бөлме болуы мүмкін деп топшылайды. Сонымен қоса осы бөлменің ортасынан жылынуға арналған ошақ пен тағы бір бөлігінде ас әзірлеуге арналған пештің орны табылған.

"Тарихи-мәдени ескерткіштерді қорғау және қалпына келтіру" дирекциясының ғылыми қызметкері Ескендір Торбековтің айтуынша, қаңлыларда көшпенділер де, жартылай көшпелі және отырықшы халық та болған. Олар егіншілікпен және қолөнермен айналысқан. Оған дәлел ретінде қамалдан қыш ыдыстар мен дән үккіштің бірнеше түрі табылған.

"Салынған ескі су арналары мен табылған жәдігерлерден осыны байқауға болады. Жалпы Қаңлы мәдениеті осы аумақта біздің заманымызға дейін ІІ ғасырдан, біздің заманымыздың IV ғасырына дейін сақталды. Сондықтан табылған жәдігерлер біз үшін өте құнды", — дейді ол.

Сонымен қатар археологтар қамалдың бір бөлігінің өзінен үш қоқыс тастайтын орын анықтаған.

"Өздерінің дүниелерін шашпаған. Қоқыс үйіндісі дейміз. Кемі ауданы 1-1,5 метр барады. Тереңдігі 2-3 метрге дейін жетеді. Сол кездегі көп дүниелер табылып жатыр", — дейді Ә.Х. Марғұлан атындағы Археология институтының жетекші ғылыми қызметкері Қуаныш Арынов.

Қорғанмен қоса қала маңынан 203 қорым табылған. Жалпы қалашықтағы қазба жұмыстары бір апта ішінде аяқталмақ. Ғалымдар одан әрі табылған құнды заттарды зерделеумен айналысады.

Мәтіннен қате тапсаңыз, бізге жазыңыз