Қарағанды облысының 53 жастағы тұрғыны бөтеннің мүлкін қасақана жойды деген күдікке ілініп, қылмыстық іс қозғалды. Фермер егістікке кіріп кеткен бір үйір жылқыны атып тастады деп айыпталып отыр, деп хабарлайды KAZ.NUR.KZ Вечерняя Караганда басылымына сілтеме жасап.

Басылымның хабарлауынша, оқиға 28 қыркүйекте Нұра ауданына қарасты Заречное ауылының маңында болған. Алдын ала мәліметке сәйкес, оқиға орнынан оқ тиген 17 жылқы табылған, олардың 14-і сол жерде өлген.

"Куәгердің айтуынша, жергілікті фермер жылқыларды көлікпен қуып жүріп, оқ атқан. Кейін оқиға орнынан ізін суытқан. Малынан айырылған ауыл тұрғындары күдікті жазадан құтылып кетеді деп қорқып отыр, себебі ол – ауқатты адам", — делінген жазбада.

Қарағанды облыстық полиция департаменті басылым тілшісіне оқиғаның болғанын растады. Құқық қорғау органдарының мәліметінше, "Бөтеннің мүлкін қасақана жою" бабы бойынша қылмыстық іс қозғалған.

Мәтіннен қате тапсаңыз, бізге жазыңыз