ІІМ басшысы Ержан Сәденов Алматы облысында үйінен күштеп шығарылған зейнеткердің оқиғасына қатысты пікір білдірді. Ол полиция қызметкерінің әрекеттерін сынап, оған қандай жаза қолданылғанын айтты, деп хабарлайды KAZ.NUR.KZ.

Ержан Сәденов бұл жағдайда полицейдің өз өкілеттігін асыра пайдаланғанын мойындады.

"Ол теріс қылығы бойынша жұмыстан шығарылды. Факт бойынша ешқандай соққы болған жоқ, бірақ ол оны итеріп жіберді. Мұны видеодан анық көруге болады. Бірақ кез-келген жағдайға қатысты баға Қылмыстық кодекс аясында беріледі. Тексеру аяқталғаннан кейін біз түсініктеме беретін боламыз", — деді министрлік басшысы.

ІІМ басшысы мұндай оқиғалар кезінде тәртіп сақшылары күш көрсетіп емес, қоғамдық қауіпсіздікті қамтамасыз ету керек екенін алға тартты.

"Бұл — жеке сот орындаушыларының секторы. Әсіре бұзушылықтар орын алған кезде немесе физикалық қарсылық болғанда ғана полиция қауіпсіздікті қамтамасыз ету үшін әрекет етуі керек. Бұл жағдайда артық кету болды. Сондықтан біз қызметкерлерге ғана емес, жалпы жұмысты ұйымдастыруға қатысты да тексеру жүргізетін боламыз. Нәтижелері міндетті түрде жария етіледі. Қызметкердің өзі жұмыстан босатылды", — деді ІІМ басшысы.

Мәтіннен қате тапсаңыз, бізге жазыңыз