Архив пен кітапхана саласында кадр даярлау көлемі ұлғайды.

Қазақстанда "Кітапхана ісі, ақпаратты өңдеу және архив ісі" мамандығы бойынша мемлекеттік гранттар саны екі есе көбейді. Бұл туралы ҚР Мәдениет және ақпарат министрлігі хабарлады.

Ведомствоның мәліметінше, кейінгі бес жылда архив, кітапхана және кітап ісін дамыту, кадрлық әлеуетті нығайту және халықаралық ынтымақтастықты кеңейту бағытында ауқымды жұмыстар атқарылған. Қазіргі таңда ел бойынша Президент архиві мен төрт арнайы мемлекеттік архивті қоса алғанда, барлығы 236 архив мекемесі жұмыс істейді. Ұлттық архив қорында 27,8 миллионнан астам сақтау бірлігі бар. Кадр даярлау мақсатында "Кітапхана ісі, ақпаратты өңдеу және архив ісі" бағыты бойынша мемлекеттік тапсырыс екі есе ұлғайып, бакалавриат гранттары 20-дан 100-ге дейін көбейді. Сонымен қатар бес өңірде қосымша 89 грант бөлінді.

"Жамбыл және Ақтөбе облыстарында жаңа аудандық архив ғимараттары ашылып, Астанада ҚР Президенті архивінің жаңа ғимараты пайдалануға берілді. 2023 жылы президент бастамасымен жас жазушылар мен ақындарға арналған президенттік арнаулы әдеби сыйлық тағайындалды. Сыйлық төрт номинация – проза, поэзия, балалар әдебиеті және драматургия бойынша беріледі, әрқайсысының жүлде қоры 4,1 млн теңге. 2025 жылы алғаш рет Ұлттық кітап күні аталып өтті. Мереке аясында "Ұлттық кітап" байқауының жеңімпаздары марапатталды", – делінген хабарламада.

Оқи отырыңыз: Енді мектептегі қыздарды акушер-гинекологтар тексеруі мүмкін

Сонымен қатар министрлік "Батырларға тағзым" веб-порталын іске қосты. Онда Ұлы Отан соғысына қатысқан 690 мыңнан астам жауынгердің дерегі жинақталған.

"Архив – 2025" жобасы аясында 14 елден мыңнан астам тарихи құжат табылып, цифрландыру жұмыстары жүргізіліп жатыр. ҚР Ұлттық архиві Сауд Арабиясы, Ресей, Литва және Түркия елдерінің архив қызметтерімен ынтымақтастық орнатқан.

Министрліктің мәлімдеуінше, бұл шаралар тарихи жадты сақтау мен ұлттық мәдениетті ілгерілетуге, сондай-ақ кітапхана және архив ісінің жаңа кезеңге көтерілуіне жол ашады.