Деректерге сүйенсек , осы Бостандық ауданы әкімдігі ауданында мемлекеттік тілде білім беретін мектептердің үлесі барлық мектептердің 23%-ын ғана құрайды екен.

Алматыда “Жайлы мектеп” жобасымен салынған тағы бір білім ошағынан шу шықты. Әуелде қазақша оқытады деген мектеп енді аралас деп ашылмақшы. Ата-аналар оқыту тілінде бір келісімге келе алмай отыр. Caravan.kz медиа порталы толық тарқатады.

Әлеуметтік желіде наразы халықтың видеолары тарап жатыр. Бостандық ауданында жаңадан бой көтерген №224 мектептің таза қазақ тілінде ашылуы бүгінгі таңда даулы мәселеге айналып отыр. Бастапқыда қазақ тілінде білім беретін мекеме ретінде жоспарланғанымен, оны аралас мектеп ретінде ашу жөнінде ұсыныстар айтыла бастады.

Оны естіген бір топ ата-ана білім ордасының қазақ тілді болуын талап етіп, видео жариялаған. Ал артынша орыстілділер “орысша оқытсын” деп шулаған. Осылайша Бостандық ауданының халқы екіге бөлініп алып мектеп үшін мәмілеге келе алмай жатыр.

«Алматыдағы 224 мектептің аралас тілде білім беруін өзіміздің қазақтар талап етіп отыр екен. Асфальтта өскен қазақтар кеше жиналып, “орысша да оқытсын” деп талап қойыпты. Ал, бүгін таза қазақтар жиналып тек қазақ мектебі болсын деп жатыр. Билік оңбаған, әкімдік орысқұл деп жата жамандаймыз. Бірақ бар бәле өзімізден болып тұр», — деп жазды журналист Диас Нұрақын.

Осы ауданда қазақ мектептерге бала сыймай жатыр.

«Мәселен, екі қызым оқитын М. Мақатаев атындағы 140-шы гимназияда бір сыныпта 35-40 баладан отыр. Жайлы мектептің жанында 94-ші аралас мектеп бар. Сондағы қазақ сыныптарын түгел жаңа мектепке көшіреді деген сыбыс айтылуда. Демек қазақ сыныптарын жауып, оны таза орыс мектебі қылмақшы. Таяқ тастам жерде тек орысша оқытатын 65-ші мектеп бар. Бір сөзбен айтқанда орысша оқимын дегендерге орын жетпей жатқан жоқ. Ал, қазақтар сыймай жатыр. Себебі “Жайлы мектептің” жанында мыңқырық жилой комплекс салынған», — деп шүйлікті Диас Нұрақын.

Бұл шешім ата-аналардың және тіл жанашырларының, қазақ халқының үлкен алаңдаушылығын тудыруда.

Сол маңайдағы білім беру ұйымдарының жағдайына көз жүгіртсек:

— №65 мектеп – аралас мектеп (бұрын тек орыс тілінде білім берген),

— №22 және №94 мектептер – аралас,

— Тек №140 мектеп қана – толық қазақ тілінде білім береді.

Алайда қазақ тілді №140 мектепте оқушы саны — 2597, ал мектептің жобалық қуаттылығы — 1100 оқушыға ғана есептелген, яғни нормадан 2,5 есе көп.

Бір параллельдегі сыныптардың әрқайсысында 30–40 бала оқиды. Бұл жағдай оқу процесінің сапасына кері әсерін тигізіп отыр, дейді мұғалімдер.

«Бір сыныпта 30-40 оқушының отыруы – мұғалімге де, балаға да ауыр. Оқушыларға сапалы оқу ортасын қалыптастыру үшін ең бірінші — сыныптағы бала санына мән беру керек», — дейді Ақмарал Шатемірқызы.

Ал қазіргі оқушылардың интерактивті әдістерді талап ететінін, жекелей қолдау қажет екенін және әр сыныпта ерекшелеу балалар бер екенін ескерсек, 25 оқушыдан асқан кез келген сыныпта білім сапасы төмен оқушылар көбейе түседі деген сөз.

«Осы таза қазақ тілді мектеп ашайық десек, жүгіре жөнелетендеріңіз не? Шаңыраққа қарап қойыңыздаршы, Бұл – Қазақстан мемлекеті. Конституциямызда Мемлекеттік тіл – қазақ тілі. Миллионнан асатын қазақтары бар көрші мемлекеттерде қазақ тілді мектептер бар ма? Қазақ мемлекетінің арқасында барлық балаларымыз 11 жыл бойы тегін білім алады», — деп пікір білдірді білім ісінің қызметкері Ақмарал Шатемірқызы.

Деректерге сүйенсек, осы Бостандық ауданы әкімдігі ауданында мемлекеттік тілде білім беретін мектептердің үлесі барлық мектептердің 23%-ын ғана құрайды екен. Қазақстанда мектептердің қазақ тілді болуы үшін қазақ халқы міндетті түрде үнемі жанайқаймен, арызданып, талап қойып, күресіп жүріп қана қол жеткізуі керек пе?!

«Қазақ балаларының да өзге өркениетті мемлекеттер сияқты өз Отанында алаңсыз қазақ тілінде таза білім алуға құқықтары бар. Ал бұл мәселені шешудің нақты жолы — 224 мектептің қазақ тілді болуы – тілдік теңсіздікті болдырмау, қазақ тіліндегі білім беруді кеңейту және бала құқығын қорғау тұрғысынан да маңызды шешім болмақ», — деп ұсыныс тастады Ақмарал Шатемірқызы.

Посмотреть эту публикацию в Instagram

Публикация от Диас Нұрақын (@diasnurakyn)