Air Astana ұшу алдындағы қауіпсіздік ережелерін еске салып, жолаушыларды авиациялық қауіпсіздік талаптарын қатаң сақтауға шақырды. Бұл туралы әуекомпаниясына сілтеме жасаған KAZ.NUR.KZ.

Әуекомпаниясы таратқан хабарламада бөгде адамдардан қандай да бір затты қабылдап, оны әуе кемесіне алып кіруге қатаң тыйым салынатыны айтылған.

Мұндай әрекеттер жолаушылар мен экипаждың қауіпсіздігіне қатер төндіруі мүмкін. Бұл талапты бұзу ұшудан шеттетуге, сондай-ақ әкімшілік немесе қылмыстық жауапкершілікке әкеп соғуы ықтимал.

Сонымен қатар әуекомпаниясы литий-ионды батареялары бар құрылғылар мен батареялардың өзін тасымалдау ережелерін еске салды.

"Пауэрбанктер мен литий-ионды батареяларды тіркелген жүкте тасымалдауға тыйым салынады. Мұндай құрылғылар тек қол жүгінде тасымалдануы тиіс, ал батарея қуаты көрсетіліп тұруы керек.

100 Вт·сағ-тан жоғары қуатты батареялар тек әуекомпаниясының рұқсатымен тасымалданады, ал 160 Вт·сағ-тан асатын батареяларды ұшақпен тасымалдауға тыйым салынады.

Ұшу кезінде пауэрбанктерді пайдалануға қатаң тыйым салынады", — делінген хабарламада.

Айта кетелік, бұған дейін Air Astana литий батареялары мен оларды қамтитын құрылғыларды тасымалдауға қойылатын бақылау шаралары күшейтелетінін мәлімдеген еді.

Мәтіннен қате тапсаңыз, бізге жазыңыз