Ақтөбеде 48 жастағы Жәния Көлдірованы жақындары 2012 жылдың желтоқсанынан бері іздеп жүр. Ал полиция іздеуді тоқтатқан, деп хабарлайды "Астана" арнасы.

Жәния Көлдірова ұшты-күйлі жоқ. Үйінен құжаттарын алып, белгісіз бағытқа кетіпті. Бір жыл өте отбасының таныстары оны орталық базар маңынан көрген екен.

"Қонаққа кеткен негізі. Мына вокзал жақта Байғанинде пәтер жалдап тұрдық. Ол кезде мен студентпін. Папам оның алдында 2006 жылы инсульт алды. Содан кейін біз пәтерге кетіп, үйді саттық", — дейді Айнұр Көлдірова.

Сол кезде қызы Айнұр жиырмадан жаңа асқан болатын. Бүгін өзі де ана. Бірақ туған анасынан он екі жылдан бері хабар жоқ.

"Газетке бердік, "Бармысың, бауырымға" да бердік. Кел дегім келеді. Қасымызда болғаны жақсы. Қандай болса да", — дейді Айнұр.

Полиция әйелдің жоғалғаны туралы істі 2012 жылы тіркеген, ауыл-аймақты түгел аралап, іздестірген. Бірақ нәтиже болмапты.

"2012 жылы Ақтөбе облысының тұрғынының жоғалуына байланысты іздестіру шаралары ұйымдастырылған болатын. Алайда 10 жыл өткеннен кейін өткізілген шаралар нәтиже бермегендіктен, қылмыстық іс қысқартылған болатын", — дейді Облыстық полиция департаментінің баспасөз хатшысы Ерболат Сарқұлов.

Айнұр үмітін үзбейді. Емші, көріпкел біткеннің бәріне барған. Олар анасының тірі екенін айтыпты. Сол сөз оған жылдар бойы күш беріп келеді. 12 жыл өтті. Бірақ перзент жүрегінде үміттің оты сөнбеген. "Бәлкім, бір күні анам есіктен кіріп келер" деген сенім Айнұрдың өмірін алға жетелеп келеді.

Мәтіннен қате тапсаңыз, бізге жазыңыз