Ішкі істер министрі Ержан Сәденовтің бұйрығымен полиция полковнигі Талғат Шаяхметов Ішкі істер министрлігінің Өзіндік қауіпсіздік департаментінің бастығы болып тағайындалды. Бұл туралы Polisia.kz порталына сілтеме жасаған KAZ.NUR.KZ хабарлайды.

Ақпараттық медиа-порталдың жазуынша, полиция полковнигі Шаяхметов ішкі істер органдарында 27 жылдан астам қызмет атқарып келеді.

Ол криминалдық полиция, ұйымдасқан қылмысқа қарсы күрес және өзіндік қауіпсіздік бойынша бөліністерде үлкен тәжірибе жинақтаған. Әр жылдары түрлі басшылық лауазымдарды, соның ішінде ІІМ ӨҚД бастығының орынбасары, аумақтық полиция департаменті бастығының орынбасары қызметтерін атқарған.

Жаңа тағайындауға дейін ІІМ Криминалдық полиция департаменті бастығының орынбасары болған.

Жаңа басшыны жеке құрамға таныстыру кезінде Ішкі істер министрі Ержан Сәденов қызметтік тәртіпті қамтамасыз ету мен құқықбұзушылықтардың алдын алу бойынша жүйелі тәсілдерді қайта қараудың маңыздылығын атап өткен.

Министр профилактикалық жұмысты күшейтуді, офицерлер құрамының әлеуетін адалдық пен ұжымдық жауапкершілік құралы ретінде белсенді пайдалануды тапсырған. Сондай-ақ антқа адал емес қызметкерлерден дер кезінде арылу қажеттігін, "ауыр салдарға жеткізбей" мәселені шешу керектігін ерекше атап өткен.

"Полицей мен құқықбұзушылық – үйлеспейтін ұғымдар. Біз бұған ешқандай жағдайда төзімділік таныта алмаймыз", — деді Ержан Саденов.

Министр сонымен қатар резонанстық оқиғаларға жол берілген жағдайда тікелей басшыларға ғана емес, сондай-ақ өзіндік қауіпсіздік бөліністеріне де жауапкершілік артылатынын еске салған.

"Біз бәріміз – сіз де, мен де – қызметтің өткені, бүгіні және болашағы үшін жауаптымыз. Барлық міндет адалдықпен, әділдікпен және ар-намыспен ымырасыз орындалуы тиіс", — деді Ержан Сәденов.

Мәтіннен қате тапсаңыз, бізге жазыңыз