Ұлытау облысының полиция қызметкерлері үш баланы өрттен аман алып қалды. Тәртіп сақшылары оларды өртеніп жатқан пәтерден алып шыққан, деп ІІМ ресми сайтына сілтеме жасаған KAZ.NUR.KZ хабарлайды.

ІІМ ақпаратына сәйкес, Сәтбаев қаласында көпқабатты тұрғын үйдің бірінші қабатында өрт шыққан.

"Сол маңды патрульдеп жүрген патрульдік полиция взводының қызмет инспекторлары Әсет Абдуакитов пен Нұрболат Нұрғабыл пәтердің терезесінен шыққан жалынды байқап, дереу көмекке ұмтылған. Сол сәтте көмек сұрап жүгіріп шыққан тұрғын пәтер ішінде кәмелетке толмаған үш баланың қалып қойғанын айтқан. Тәртіп сақшылары еш кідірместен пәтерге кіріп, төсектің астынан бір баланы тауып, қауіпсіз жерге шығарып үлгерген", — делінген ресми хабарламада.

Бірінші баланы құтқарғаннан кейін, полицейлер екінші бөлмеге кіруге тырысқан. Алайда төбені шарпыған от ішке өтуге мүмкіндік бермеген. Тәртіп сақшылары сыртқа шығып, терезенің торын жұлып алып, қалған екі баланы терезе арқылы шығарып, аман алып қалған.

Өрт сөндіру қызметі дереу шақырылып, тілсіз жау толықтай ауыздықталды. Зардап шеккендер жоқ.

Мәтіннен қате тапсаңыз, бізге жазыңыз