Қазақстан мен Сербия арасында визасыз режим қолданылады.

Қазақстан мен Сербия астаналары арасында тікелей әуе қатынасы іске қосылды, деп хабарлады Көлік министрлігі.

Тікелей рейстерді ашу туралы келісімге президент Қасым-Жомарт Тоқаевтың Сербияға ресми сапары кезінде қол жеткізілген. Жоба Қазақстанның Сыртқы істер министрлігі мен Сербиядағы елшілігінің қолдауымен жүзеге асты. Белград әуежайында қазақстандық делегацияны Сербия Ұлттық жиналысының спикері Ана Брнабич пен көлік министрінің орынбасары Верика Ечменица қарсы алды.

"Астана мен Белград арасындағы тікелей рейстердің ашылуы — екі ел арасындағы бизнес, туризм және мәдени ынтымақтастықты арттырудағы маңызды қадам", – деді Қазақстанның көлік министрі Талғат Ластаев.

Қазақстан мен Сербия арасында визасыз режим бар. Ұшу ұзақтығы шамамен 5 сағат 40 минутты құрайды. Алғашқы рейспен 92 жолаушы ұшқан.

Оқи отырыңыз: Астана тұрғындары қыста да Үрімжіге тікелей әуе рейсімен қатынай алады

Астана – Белград – Астана бағытындағы рейстерді SCAT Airlines компаниясы аптасына екі рет — дүйсенбі және бейсенбі күндері орындайды. Ұшақ түрі – заманауи Boeing 737.

Компания сонымен қатар Еуропаның басқа қалаларына да ұшуды жалғастырып келеді:

• Астана – Прага (аптасына 2 рет, сейсенбі және сенбі күндері);
• Шымкент – Будапешт (аптасына 2 рет, сейсенбі және бейсенбі күндері);
• Шымкент – Мюнхен (аптасына 2 рет, сейсенбі және бейсенбі күндері).