Көппәтерлі үйді басқару субъектілерінің үш түрі қолданылады

Бұл туралы Caravan.kz медиа порталы Sputnik.kz-ке сілтеме жасап хабарлайды.

Мәжіліс депутаттары көппәтерлі үйлерді басқару жүйесіне өзгеріс енгізуге арналған заң жобасын әзірледі, деп хабарлайды Sputnik Қазақстан тілшісі.

Депутат Екатерина Смышляеваның айтуынша, саладағы реформаға қарамастан, пәтер иелері кооперативтері әлі де бар. Заңда олардың ашықтығына қатысты нақты талаптар айқындалған. Сондай-ақ тұрғындар үшін кондоминиумды басқару нысандары мен шарттарын таңдауға барынша еркін құқықтық орта құру қарастырылған. Ол үшін заң жобасында кондоминиумды басқарудың екі түрі енгізілген. Олар:

мүлік иелерін біріктіру,

тікелей бірлескен басқару.

«Ал қарапайым серіктестіктер жеке нысан ретінде алынып тасталады, бірақ іс жүзінде басқарудың екінші нысаны түрінде өз жұмысын жалғастыра алады», — деді Смышляева мәжілістің бүгінгі отырысында.

Көппәтерлі үйді басқару субъектілерінің үш түрі қолданылады. Олар:

басқарушы компания;

кәсіби басқарушы;

пәтер иелерінің кооперативі.

Заңда қарастырылғар негізгі өзгерістер:

меншік иелері бірлестігі төрағасының өкілеттік мерзімі бір жылдан үш жылға дейін ұлғаяды;

меншік иелерінің бірлестігіне үйді басқару жөніндегі қызметті өз еркімен жүргізуге құқық беріледі;

құрылыс салушының бірінші пәтерді сатқаннан кейін кондоминиумды тіркеу міндеттемесі енгізіледі;

тұрғын үй инспекциясының өкілеттіктері кеңейтіледі.

Заңға сәйкес, кәсіби басқарушыларда біліктілік сертификаты болуы шарт. Сондай-ақ тұрғындарға есеп бермегені үшін және қажетті құжаттарды ұсынудан бас тартқаны үшін әкімшілік жауапкершілік күшейтіледі.

«Бұл өзгерістер көппәтерлі тұрғын үй тұрғындарының құқығын қорғауға бағытталған. Тек қана олардың ортақ шешімімен тиісті басқару нысаны қабылданады, басқарушы компания таңдалады және тариф бекітіледі»,-деп атап өтті депутат Смышляева.