Былтыр алапат тасқынға байланысты елдің он облысында төтенше жағдай жарияланған.

Мәжіліс депутаты Нартай Сәрсенғалиев су тасқынына қарсы дайындықтың деңгейіне байланысты мәселе көтерді, деп хабарлайды inbusiness.kz сайты.

"Қазақстанға көктем келді дегенше, су тасқынының қатері қатар келді деуге болады. Білесіздер, былтыр еліміз алапат су тасқынының астында қалып, еліміздің тең жартысы су астында қалды. Он облыста төтенше жағдай жарияланды. Оның салдарын жоямыз деп Үкіметтің резервінен 46,9 млрд теңге бөлінді. Жергілікті бюджеттен де есепсіз қаржы кетті. Төтенше жағдайдың алдын алу жұмыстары дұрыс жүргізілгенде аталған ақшаны басқа мақсаттарға, елдің әлеуметтік мәселелерін шешуге қолдануға болар еді. Болар іс болды", — деді депутат.

"Биыл Қазақстанда бірде-бір елдімекен су астында қалмайды деп, елге тыныштық сыйлай аламыз ба, жоқ па?" деп сұрады депутат құзырлы орган өкілдерінен.

"Өйткені сіздер 1223 елдімекен су астында қалуы мүмкін деген ақпарат тараттыңыздар. Осыған нақты жауап берсеңіздер", — деді Нартай Аралбайұлы.

Премьер-министрдің орынбасары Ермек Көшербаевтың сөзінше, былтырдан бері Үкіметте жедел штаб жұмыс істеп тұр.

"Мониторинг жүргізіліп жатыр. Тәулік бойы Төтенше жағдай министрлігі, облыс әкімдері жағдайды бақылап отыр. Алгоритм бекітілген. Өзімнің өңірден келгеніме бір ай болған жоқ. Апта сайын тиісті министрліктермен су тасқынына, қар көшкініне байланысты жедел штабтың отырысына қатысып отыратынбыз. Әр облыста осындай штаб бар. Әр өңірдің жағдайы ерекшеленеді. Соған қарай қаражат бөлінген, тиісті шаралар жоспары бекітілген. Техника мен құтқарушылар дайын отыр. Мемлекеттік материалдық резервте қажетті заттар бар", — деді вице-премьер.

Су ресурстары және ирригация вице-министрі Ерболат Ибрайхановтың жауабына сүйенсек, су тасқыны болған жағдайда су қоймалары суды қабылдауға дайын.

Төтенше жағдайлар министрлігі өкілінің айтуынша, жергілікті атқарушы органдар су тасқынына қарсы шаралар өткізілген. Дамбылар, дренаждық жүйелер жөндеуден өткен.