Алматының Алатау ауданында ЖЭО-2 аумағындағы апатты жағдай салдарынан бірден бірнеше шағынаудан тұрғындары жарықсыз қалды. Бұл туралы "Алатау Жарық Компаниясына" сілтеме жасаған KAZ.NUR.KZ хабарлайды.

Компанияның баспасөз қызметінің хабарлауынша, 13 қарашада ЖЭО-2 аумағында 110 кВ №124А және №101А жоғары кернеулі электр желілерінің апатты түрде өшірілуі тіркеліп, салдарынан ПС-162А "Алғабас", ПС-169А "Ақбұлақ" және ПС-123А "АТЭЦ-2" қосалқы станциялары уақытша электр қуатынан ажыратылды.

"Ақбұлақ, Алғабас, Ақкент, Саялы, Теректі, Ғажайып, Көксай, Нұркент, Дарабоз, Зерделі тұрғын массивтері мен Райымбек даңғылы – Момышұлы – Мөңкеби көшелері шеңберіндегі аумақтар жарықсыз қалды", — делінген ресми хабарламада.

Оқиға орнына жедел апаттық-қалпына келтіру бригадалары жіберілді. Қазіргі уақытта мамандар апаттың себептерін анықтап, жарықты кезең-кезеңімен қалпына келтіру жұмыстарын жүргізіп жатыр.

Мәтіннен қате тапсаңыз, бізге жазыңыз