Алматыда өткен Қазақстан қаржыгерлерінің XIII конгресінде ҚР Ұлттық банкінің төрағасы Тимур Сүлейменов қаржы секторының 2026 жылға арналған негізгі даму бағыты цифрландыру болатынын мәлімдеді.

Оның айтуынша, Ұлттық банк, Қаржы нарығын реттеу және дамыту агенттігі және нарық қатысушылары бес жылдық цифрландыру стратегиясын әзірлеген.

Стратегия аясында 2025 жылдың соңына дейін ұлттық крипторезервтің мемлекеттік цифрлық активтер қоры іске қосылады. Сонымен бірге ұлттық кастодиалдық сақтау жүйесін құру жұмыстары басталған. Бұл жүйе бағалы қағаздардың Орталық депозитарийі базасында қалыптасады.

Сүлейменовтің айтуынша, келесі маңызды бағыт – жасанды интеллектті енгізу. Қазіргі уақытта сандық деректерге негізделген экожүйе құрылып жатыр, қаржы нарығының деректер фабрикасы іске қосылған. Алаяқтықтың алдын алу үшін антифрод агенттері, сондай-ақ талдау, валюталық бақылау және ақшаны жылыстатуға қарсы іс-қимылға арналған ЖИ құралдары енгізілуде.

Ұлттық банк төрағасы цифрлық активтерді дамытуға да ерекше назар аударылатынын атап өтті. Жаңа заңнамада олар қаржы секторының толыққанды бөлігі ретінде белгіленген.

Сонымен қатар, Сүлейменов бағалы қағаздар нарығын реформалау келесі жылдың маңызды міндеті болатынын жеткізді. Бұл бағытта нарық қатысушыларымен, халықаралық ұйымдармен бірлесіп терең талдау жүргізіліп, қор нарығын реттеудің кешенді реформасы әзірленбек. Оның айтуынша, «Астана» халықаралық қаржы орталығының оң тәжірибесі ұлттық заңнама ерекшеліктерін ескере отырып қолданылатын болады.