Қазақстанда денсаулық скринингі бағдарламалары жаңартылды. Скринингке қатысу жасы ұлғайтылып, жасы 50-ден асқан ерлерге арналған жаңа скрининг енгізілді. Бұл туралы Денсаулық сақтау министрлігіне сілтеме жасаған KAZ.NUR.KZ хабарлайды.

Министрлік мәліметінше, өзгерістер ауруларды ерте анықтаудың тиімділігін арттыруға және халықты қамтуды кеңейтуге бағытталған.

Скринингке жаңа зерттеулер енгізілді. Нақтырақ айтқанда:

• ТТЛП (төмен тығыздықтағы липопротеидтер);
• триглицеридтер;
• гликирленген гемоглобин.

Сондай-ақ скринингке қатысу жасы 76 жасқа дейін ұлғайтылды, бұл профилактикалық бағдарламаларға егде жастағы адамдарды көбірек тартуға мүмкіндік береді, дейді министрлік өкілдері.

Одан бөлек арнайы мамандардың негізсіз консультациялары алып тасталды. Егер зерттеу нәтижелері қалыпты болса, скринингті мейіргер — басқа мамандарға жолдамасыз аяқтауы мүмкін.

Цереброваскулярлық бұзылулардың алдын алу үшін МӘМС-ке жасы елуден асқан ерлерге арналған жаңа скрининг енгізілді: брахиоцефалиялық тамырлардың ультрадыбыстық зерттеуі, екі жылда бір рет.

"Қыркүйектен бастап онкоскринингтердің барлық кезеңі ТМККК шеңберінде қолжетімді болды, бұл зерттеп-қараудан өтуді жеңілдетеді және халыққа қаржылық жүктемені азайтады.

Жаңартылған стандарттар скринингтерді дәлірек, заманауи және пациенттерге ыңғайлы етеді", — делінген министрлік хабарламасында.

Мәтіннен қате тапсаңыз, бізге жазыңыз