«Respublica» партиясының төрағасы Айдарбек Ходжаназаров бүгін Мәжілістің жалпы отырысында 100-ден астам кәсіпкердің өтініш-шағымын жеткізді, деп жазады Egemen.kz.

Айдарбек Ходжаназаров бұл шағымдарды электр энергиясы тарифтерінің қымбаттауы, индустриялық аймақтар мен инфрақұрылымның жеткіліксіздігі, отандық өндірушілердің мемлекеттік сатып алуларға қолжетімділігінің төмендігі, әкімшілік кедергілер мен тексерулердің көбеюі, жедел медициналық жекеменшік қызметтердің құқықтық реттелуі сынды 5 тақырып аясына топтастырған.

Депутаттың айтуынша, аталған мәселелер еліміздің экономикалық дамуына кері әсерін тигізіп, жаңа өндірістер мен жұмыс орындарын ашуға тосқауыл болып отыр.

Ол депутаттық сауалында мәселені шешудің 5 жолын қоса ұсынды.

-Кейбір өңірлерде электр энергиясының тарифі кейінгі екі жылда 50-60%-ға өскен. Ақтөбе облысында тариф 52 тг/кВт, Түркістан мен Шымкентте 48 тг/кВт жеткен. Бұл өз кезегінде кәсіпкерлердің ісіне кері әсерін тигізбей қоймайды, — деген Айдарбек Ходжаназаров тариф белгілеу жүйесіне қоғамдық бақылау енгізіп, электр энергиясының соңғы бағасына қандай делдалдар әсер ететінін ашық жариялауды ұсынды.

Сондай-ақ, электр энергиясының көтерме және бөлшек нарығындағы монополияға қарсы тексеру жүргізіп, кәсіпкерлер үшін икемді тарифтік саясат әзірлеу, тұтыну көлеміне қарай жеңілдіктер қарастыру бастамасын көтерді.

«Respublica» партиясының төрағасы индустриялық аймақтар мен инфрақұрылымды дамыту, мемлекеттік сатып алулардағы әділетсіз бәсекеге қатысты да өзекті мәселелерді ортаға салды.

2023 жылы Қазақстанда 12 000 бизнесті заңсыз тексеру дерегі тіркелген. Алматыда тексерулердің 40%-ы сотта заңсыз деп танылғаны белгілі болды.

«Кәсіпкерлер тексеруші органдар тарапынан әділетсіз қысымға ұшырап отыр. Сондықтан әрбір мемлекеттік органда бизнес омбудсменін енгізіп, барлық тексерулер «Бір терезе» қағидасы бойынша жүргізіліп, кәсіпкерлер жылына тек бір рет есеп беруі тиіс.Тексерулерді онлайн тіркеу және кәсіпкерлерге заңсыз тексеру жүргізген шенеуніктерді жауапкершілікке тарту қажет», деді Айдарбек Ходжаназаров.