Оның айтуынша, қазір жылқы мен жылқы еті арзан бағада көрші елдерге сатылып жатыр.

Мәжіліс депутаты Аманжол Әлтай премьер-министрдің орынбасары және ұлттық экономика министрі Серік Жұманғариннің атына депутаттық сауал жолдап, ел ішінде жылқы етін тұтыну көлемін арттыратын кешенді шаралар қабылдауды сұрады.

Депутаттың сөзінше, қазіргі таңда ел ішінде жылқы етіне сұраныс төмен болғандықтан, оны мәжбүрліктен тірі күйінде не тұтас етін көрші елдерге арзан бағада сату үрдіске айналған.

"Балабақшалар мен мектептерді, әскерді, өндіріс орындарындағы жұмысшыларды жылқы етімен қамтамасыз ету – халықтың денсаулығын реттеудегі аса маңызды қадам болар еді. Сыртқы нарықтар бойынша: жылқы еті ондаған мың тонна өндірілсе де, ресми экспорт символикалық деңгейде ғана қалып отыр (жылына шамамен 0,2 т). Негізгі себеп – сертификаттау мен инфрақұрылымдық кедергілер. Анықталған проблема рационды әртараптандырудың (оның ішінде ұлттық тағамдарды енгізудің) нормативтік мүмкіндігі болғанымен, жылқы еті көптеген тапсырыс берушілердің үлгілік тізбелері мен сатып алу ас мәзірлері әдістемелерінде бекітілмеген. Жылқы етіне қатысты бірыңғай техникалық карталар, сапа критерийлері жоқ. Жылқы өнімдерін тікелей шаруадан кооперативтік жүйеде сатып алу мүлде реттелмеген", – деді Аманжол Әлтай.

Оның сөзінше, егер жылқы етін нарыққа шығаруда сапалы және тиімді жүйе қалыптастырылса рациондық құрам жақсарып, нарықтағы жылқы етінің сатылымы тұрақтанып, ауыл табысы артып, шикізаттық емес валюталық түсімді әртараптандырылмақ.

Осы ретте Аманжол Әлтай Денсаулық сақтау және Оқу-ағарту министрліктеріне мектепке дейінгі ұйымдар, мектептер, колледждер, медицина ұйымдарына арналған үлгілік тізімдерге және әдістемелік ұсынымдарға жылқы етін енгізуді, ал Қорғаныс министрлігіне, ІІМ және өзге де күштік құрылымдарға – азық-түлік нормаларын түзету мүмкіндігін қарастыруды ұсынды.