Еуроодақтың Сыртқы істер министрлері Брюссельде шұғыл жиналды. Басқосуда Украина бойынша жаңа бейбіт жоспар талқыланбақ, деп хабарлайды 24.kz.

28 тармақтан тұратын құжатты АҚШ тарабы әзірлеген.

"Бейбіт жоспар қабылдануы үшін еуропалықтар мен украиналықтардың келісімі қажет", — дейді Еуропалық дипломатияның басшысы Кая Каллас.

Америка Құрама Штаттарының мемлекеттік хатшысы Марко Рубионың айтуына қарағанда, құжатта Мәскеу мен Киевтің мүддесі бірдей ескерілген.

Ал батыс ақпарат құралдарының дерегі бойынша, Украина айырылып қалған жерлерін толық қайтара алмайды. Есесіне АҚШ Киевке қауіпсіздік кепілдігін беруге дайын. Сондай-ақ Украина НАТО-ға кіруден бас тартуға тиіс.

Алайда Кремль жаңа бейбіт жоспардан бейхабар екенін жеткізді.

"Мәскеу Вашингтонмен Украина бойынша жаңа келісімдерге қол жеткізген жоқ", — деп мәлімдеді ресейлік тарап.

Мәтіннен қате тапсаңыз, бізге жазыңыз