Дүниежүзілік денсаулық сақтау ұйымының өкілі Қазақстандағы қайғылы оқиғаларға байланысты елімізге көңіл айтып, қажет болған жағдайда көмек көрсетуге дайын екенін білдірді, деп хабарлайды KAZ.NUR.KZ.

Денсаулық сақтау министрі Ақмарал Әлназарова Instagram желісіндегі парақшасында Қазақстанда болған қайғылы оқиғалар халықаралық ұйымдардарды да бейжай қалдырмағанын жазды.

ДДҰ Еуропалық бюросының басшысы доктор Ханс Клюге жедел жәрдем қызметі фельдшерінің қаза болуына және өрт салдарынан балалардың қаза табуына байланысты көңіл айтқан.

"Құрметті министр ханым,

Адамдарды құтқару міндетін атқару кезінде Астанада жас медицина қызметкерінің қаза болуына байланысты шынайы көңіл білдіремін.

Түркістан облысының Алғабас ауылында 9 баланы қоса алғанда, үлкен отбасының қаза болуына байланысты Қазақстанға аса қайғырып көңіл айтамыз.

Балалардың өрттен қаза болуы — аса ауыр қайғы, жақындарының қандай қасірет шеккенін елестету мүмкін емес.

Қажет болған жағдайда ДДҰ көмек көрсетуге дайын.

Қайғыларыңызға ортақпыз, құрметті министр ханым", — деген халықаралық ұйым өкілінің сөзін келтірді министр.

Фельдшердің қазасы

8 қарашада Астанада тоғыз қабатты тұрғын үйдің қасбетінен сыртқы қаптама кірпіш пен кондиционер құлаған еді. Құтқарушылар зардап шеккендерді шығарып, жедел жәрдем бригадасына тапсырды.

Белгілі болғандай, оқиға орнында жедел жәрдем фельдшері зардап шекті. Ол ер адамды үйінді астынан алып шықпақ болған кезде оның басына тоғызыншы қабаттан кондиционер құлап кеткен. Жәбірленушіге бассүйек трепанациясы жасалды.

23 жастағы фельдшер Ұлдана Мырзуанның көз жұмғаны туралы 18 қарашада белгілі болды. Жедел жәрдем қызметкері 8 қарашадан бері жансақтау бөлімінде ауыр халде жатқан болатын.

Марқұм болған елордалық жедел жәрдем станциясының 23 жастағы фельдшері Ұлдана Мырзуан "Ерлігі үшін" медалімен марапатталды.

Алғабастағы өрт

18 қараша таңғы уақытта Түркістан облысында болған қайғылы оқиға қоғамды дүр сілкіндірген еді. Жетісай ауданы Алғабас ауылында жеке үйдегі өрт 12 адамның өмірін қиған болатын. Зардап шеккен үш адам ауыр жағдайда ауруханаға жатқызылғанын хабарлағанбыз.

Мемлекет басшысы осы қайғылы оқиғаға байланысты үкімет пен облыс әкіміне тапсырма берді.

Полиция өрт фактісі бойынша "Өрт қауіпсіздігі талаптарын бұзу" бабымен қылмыстық іс қозғады, сондай-ақ өрттің себептерін тергеу жөніндегі үкіметтік комиссия құрылды.

19 қарашада өрттен зардап шеккен үш адамның бірі Шымкенттегі ауруханаға жеткізілді. 20 қарашада өрттен зардап шеккен тағы бір адам тікұшақпен Шымкентке жеткізілді.

Сонымен қатар өрттің шығуына не себеп болуы мүмкін екені айтылды.

Мәтіннен қате тапсаңыз, бізге жазыңыз